ԱՄՆ դեսպանի հայտարարությունը հուշում է. Սերժ Սարգսյանին անհանգստացնում է Սեֆիլյանի գործոնը

Հասկանալի է, որ ԱՄՆ դեսպանի վերջին հայտարարությունը կատարվել է փաստացի Բաղրամյան 26 –ի խնդրանքով:

Ժիրայր Սեֆիլյանի 10.5 տարվա դատավճրից հետո իշխանությունները մտահոգված էին Սեֆիլյանի կողմնակիցների հնարավոր հետագա քայլերից: Ավելին, ապրիլյան հայտնի զարգացումները հաշվի առնելով, իշխանությունները մտավախություն ունեն, որ Սեֆիլյանի կողմնակիցների գործողությունները կարող են լեգիտիմացվել հանրության զգալի մասի կողմից: Եվ ահա այս ամենը հաշվի առնելով, իշխանությունը փորձում է «տղա կանչել» ի դեմս ԱՄՆ դեսպանի: Ֆորմալ պատճառաբանությունն էլ կա: Սեֆիլյանի կողմնակիցները օգտագործում են ծայրաստիճան հակառուսական հռետորաբանություն, ինչը շատերի մոտ կասկած է առաջացնում, որ նրանց աջակցում են Արևմուտքում: Համենայնդեպս, գոնե այդպես են մտածում ռուսական որոշ շրջանակներ: Սակայն զարմանալիորեն այդպես են մտածում նաև շատերը Հայաստանում, ինչը վտանգավոր է իշխանությունների համար, քանզի «դրսից ակնկալիքը» կարող է լրացուցիչ ուժ հաղորդել Սեֆիլյանի կողմնակիցներին: Ահա թե ինչու իշխանությանը անհրաժեշտ էր ԱՄՆ դեսպանի պարզաբանումը:

Հասկանալի էր նաև խնդրանքի տրամաբանությունը: Եթե Վաշինգտոնը կապ չունի ահաբեկչության կողմնակիցների հետ Հայաստանում, ապա պետք է հրապարակավ տարանջատվի նրանցից, ինչն էլ կատարեց ԱՄՆ դեսպանը: Ավելին, նա նշեց, որ «Սասնա ծռերի» գործողությունները իրենց համար հատկապես անընդունելի են : Դրանով պարոն Միլզը փորձեց վերջնականապես փակել «Սասնա ծռերի» և ամերիկացիների հնարավոր կապի մասին խոսակցությունները:

Միաժամանակ, պարոն Միլզը իր հայտարարության մեջ նշեց, որ «… սրա հետ մեկտեղ, արդար դատաքննության իրավունքը պետք է իրացվի բոլոր մեղադրյալների համար»՝ ակնարկելով, որ Սեֆիլյանի կողմնակիցները իրավունք ունեն վիճարկել իրենց առաջնորդի 10.5 տարվա դատավճիռը :

Այս ամենը ցույց է տալիս, որ Բաղրամյան 26-ը լրջորեն վախեցած է հնարավոր ապագա «ֆորս- մաժորներից» և փորձում է գոնե թուլացնել այդ հնարավոր գործողությունների լեգիտիմության աստիճանը հայ հանրության մեջ:

Արտակ Հակոբյան