Արման Սարոյանը դատարան եկավ ոստիկանների ուղեկցությամբ «անամnթ», «զզվшնք» գոռոցների ներքո

Արմավիրի մարզի առաջին ատյանի ընդհանուր իրավասության քրեական դատարանի Վաղարշապատի նստավայրում, դատավոր Սերժ Ռուշանյանի նախագահությամբ, Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի և Գերագույն հոգևոր խորհրդի անդամ վեց եպիսկոպոսների ու արքեպիսկոպոսների վերաբերյալ քրեական գործով նախնական դատալսումների նիստին ներկա է Արման Սարոյանը։  Նա դատարան եկավ ոստիկանների ուղեկցությամբ։ Դատարանի մոտ հավաքվածները գոռացին՝ «անամոթ», «զզվանք»։ 

Լրատվամիջոցների հաղորդմամբ, նա միջնորդություն ներկայացրեց նիստը դռնփակ անցկացնելու վերաբերյալ. սահմանափակել ոչ միայն կողմնակի անձանց, այլ նաև լրագրողների ներկայությունը։ Փաստինֆոյի հաղորդմամբ, դատական նիստի մեկնարկին, երբ նախագահողը փորձում էր պարզել լուսաբանման վերաբերյալ կողմերի դիրքորոշումը, տուժող ճանաչված Արման Սարոյանը պահանջեց նիստերը դռնփակ ռեժիմով քննել՝ դեմ լինելով ոչ միայն նիստերի հեռարձակմանը, այլև առհասարակ հրապարակայնությանը։ Սարոյանը հայտարարեց, թե այս գործընթացի սկսվելուց հետո իր նկատմամբ արշավ է իրականացվում, սպառնալիքներ են հնչեցվում։ Նա անգամ հայտարարեց, որ քրեական վարույթներ կան նախաձեռնված՝ սպառնալիքների վերաբերյալ։ Պաշտպանության կողմն առարկեց՝ ընդգծելով գործերի քննության հրապարակայնության կարևորությունը։ 

Վեհափառը և եպիսկոպոսները կողմ են լուսաբանմանը։ Ինչ վերաբերում է սպառնալիքներին, ապա պաշտպանության կողմը հիշատակեց անվտանգության միջոցների գործիքակազմը։ Հանրային մեղադրողները միացան Սարոյանի դիրքորոշմանը՝ հայտարարելով, թե նիստերը պետք է դռնփակ անցկացվեն։

Դատավոր Սերժ Ռուշանյանը մերժեց միջնորդությունը. նիստը կանցկացվի դռնբաց։
Հիշեցնենք՝ ըստ մեղադրանքի Ամենայն Հայոց Կաթողիկոսը կարգալույծ է հռչակել նախկին Գևորգ եպիսկոպոս Սարոյանին, և հենց այդ կարգալուծումն է մեղադրանքի կողմից որակվել որպես դատական ակտի կատարմանը խոչընդոտում։
Աղբյուրը` Panorama.am