Գագիկ Ծառուկյանին կձերբակալե՞ն. Արման Աբովյանը չի բացառում

Այսօր Փաշինյան թռել է Մոսկվա և հենց այսօր էլ տեսնում ենք այս խուզարկությունը կամ  խուժանությունը կամ կիսառազմականացված օպերացիան։ Այս մասին այսօր՝ հուլիսի 6–ին, ԲՀԿ առաջնորդ Գագիկ Ծառուկյանի ըան դիմաց լրագրողների հետ զրույցում նշեց ԲՀԿ անդամ Արման Աբովյանը։

«Այսօր Հայաստանի Հանրապետությունում ենթարկվում են կատաղի ճնշումների ընդդիմադիրները և ամենակատաղի ճնշումը դեպի Գագիկ Ծառուկյանն է։ Եվ հարց տանք մեզ՝ ինչի՞ համար է սա արվում։ Սա իրականում գիտեք, ֆաշիզմի ուղղակի դրսևորում է, երբ որ իշխանությունը փորձում է ոչ թե լռեցնել, այլ ընդհանրապես փորձել չեզոքացնել ընդդիմադիր լիդերներին, մասնավորապես Գագիկ Ծառուկյանին։

Խնդիրն այն է, որ Հայաստանի Հանրապետության քաղաքացիների բացարձակ մեծամասնությունը մերժեց իրենց, բայց դա բնավ չի նշանակում, որ իրենք չպետք է կատարեն այն հանձնարարականները, որոնք իջեցվել էին Բաքվից և Անկարայից։ Հիշենք, որ գոյություն ունի Սահմանադրության փոխման գործընթաց, և սա ուղիղի կապ ունի Ադրբեջանի նպատակների հետ։

Երկրորդը, Հայաստանի Հանրապետության տարածքների հանձնումն է՝ շինծու անկլավների տեսանկյունից։ Հաջորդը ադրբեջանցիների բնակեցման թեման է, ոև չնայած սրանք իրենց ճղում են, որ այդպիսի բան չկա, բայց մենք փաստերի վրա ենք հենվում»,–ասաց նա։

Արման Աբովյանը հայտարարեց, որ այն ինչ կատարվում է Գագիկ Ծառուկյանի հետ, դա գործողություն է, որի հիմնական նպատակն է փորձել ջարդել պայմանական ընդդիմությանը. «Այստեղ շատ կարևոր է հասկանալ հասարակության արձագանքը, որովհետև այստեղ միայն Ծառուկյանի խնդիրը չի։ Այստեղ բոլորի խնդիրն է, նույնիսկ այն մարդկանց, որոնք այսօր միգուցե այսպես ասենք հա չեն համակրում ԲՀԿ–ին»։

ԲՀԿ անդամի խոսքով, սա անակնկալ չէ ոչ Գագիկ Ծառուկյանի համար, ոչ էլ իրենց համար. «Իրենք գործում են լրիվ հակապետական և հակահայկական տրամաբանության ներքո։ Այդ ի՞նչ է արել Ծառուկյանը, որ որոշել են սենց ավտոմատավորներով, քիչ է մնում ուղղաթիռներով իջնեն»։

Ինչ վերաբերում է ՍԴ որոշմանը, Արման Աբովյանն ասաց. «ՍԴ–ն հրաժարվեց պաշտպանել Հայաստանի Հանրապետության Սահմանադրությունը, իսկ այս ամենը արդեն ածանցյալն է այդ ամբողջ գլոբալ գործընթացի»։

Ավելի վաղ NEWS.am–ը հայտնել էր, որ այսօր՝ հուլիսի 6–ի վառ առավոտյան խուզարկություն է իրականացվում Գագիկ Ծառուկյանի տանը։ Ավելի ուշ ԲՀԿ առաջնորդի խոսնակ Իվետա Տոնոյանը հայտնել էր, որ լայնածավալ խուզարկություններ են իրականացվում նաև «Մուլտի Գրուպ» կոնցեռնի կազմում ընդգրկված գրեթե բոլոր ընկերություններում, ինչպես նաև այդ կազմակերպությունների տնօրենների բնակարաններում։

ԲՀԿ անդամ Արման Աբովյանը հայտնել էր, որ Գագիկ Ծառուկյանի տունը շրջապատված է, ինչ–որ ռազմական հագուստով ավտոմատավորներ են։ Ավելի ուշ Աբովյանը նոր տեսանյութ է տարածել Ծառուկյանի տան դիմացից՝ նշելով, որ վերևում դրոններ են աշխատում. «Որոշ տվյալներով նաև Գագիկ Ծառուկյանին պատկանող կամ նրա հետ կապ ունեցող վայրեր են մտել խուզարկության.  Խոսքը վերաբերում է Կոնյակի գործարանի, Օլիմպավանի, «Մուլտի վելնես» ընկերության մասին է»։