Արցախցի մանչուկը շարունակում է հաղթել

Արցախցի Արամը՝ այն տղան, որ հրաժարվել էր հողատու Փաշինյանի ձեռքից վերցնել բզկտված Հայաստանի քարտեզ-կրծքանշանը, Շախմատի ակադեմիայում ապրիլի 11-20-ը Հայաստանի պատանիների եզրափակիչ առաջնությանը մինչև 8 տարեկանների խմբում ցուցաբերած արդյունքների շնորհիվ իրավունք ստացավ Հայաստանը ներկայացնելու Աշխարհի և Եվրոպայի շախմատի առաջնություններում։ Այս մասին ֆեյսբուքի էջում գրել է բլոգեր Արամ Գևորգյանը։

Արամն արցախցի Արմինե Մոսիյանի որդին է, որի հետ Նիկոլ Փաշինյանը մետրոյում կոնֆլիկտ էր ունեցել։

Մարտի 22-ին մետրոյում Նիկոլ Փաշինյանը երևանյան քարոզարշավի ժամանակ բղավելով խոսել էր արցախցի երիտասարդ կնոջ հետ, որը մանկահասակ երեխայի հետ էր։

Կինը հրաժարվել էր վերցնել «Քաղաքացիական պայմանագիր» կուսակցության քարոզչական խորհրդանիշ դարձած Հայաստանի քարտեզը՝ կրծքանշանի տեսքով։

Փաշինյանն արցախցիներին «փախածներ» էր անվանել ու ասել, որ չփորձեն իրեն մեղադրել Ղարաբաղը հանձնելու համար։ Իսկ իշխանական քարոզչամեքենան, իր կից ֆեյքերով, կատաղի հարձակում և մաղձոտած ատելության քարոզ էր սկսել արցախցիների դեմ՝ թիրախավորելով Արմինե Մոսիյանին: