Հետաքրքիր է, Գագիկ Հարությունյանը Արմեն Սարգսյանի ու Գագիկ Ծառուկյանի հետ ազգակցական կապեր չունի՞
Երեկվա ԱԺ-ի քննակրումները մի հետաքրքիր փաստի ուշադրության արժանացրին: Պարզվում է «Հայաստանում բոլորը բոլորի հետ բարեկամ են»: Այդ միտքն էր հայտնել ՍԴ նախագահ Գագիկ Հարությունյանը՝ պատասխանելով իր բազմաթիվ ու բազմաբնույթ ազգակցական կապերի մասին: Իսկ որ դրանք իրոք որ բազմաթիվ են, ակնհայտ է: Դատեք ինքներդ, Սերժ Սարգսյանի կրտսեր դուստրը ամուսնացած է Գագիկ Հարությունյանին զարմիկի հետ: Միաժամանակ, պարիտետը պահպանված է նաև Տաշիրների մասով, և մասնավորապես, Գագիկ Հարությունյանի եղբորորդին՝ Հայկ Հարությունյանը, ներկայիս վարչապետ Կարեն կարապետյանի փեսան է և աշխատում է էներգետիկայի փոխնախարարի պաշտոնում:
Բացի այդ, Գագիկ Հարությունյանի տոհմը լայն ներկայություն ունի նաև ուժային կառույցներում: Նրա եղբայրը՝ Արզուման Հարությունյանը, ԱԱԾ-ի տնօրենի առաջին տեղակալն է, իսկ որդին՝ Արտակ Հարությունյանը, ՀՀ Գլխավոր դատախազության կոռուպցիոն և կազմակերպված հանցագործությունների գործերով վարչության պետն է: Իսկ քրոջ՝ Շամամ Հարությունյանի փեսան է Արտաշես Բեգլարյանը՝ ՀՀ ՊԵԿ օպերատիվ հետախուզության վարչության պետի տեղակալը: Ի դեպ, անգործ չէ մնացել նաև Շամամը, նա այսօր զբաղեցնում է ՀՀ աշխատանքի և սոցիալական հարցերի նախարարի տեղակալի պաշտոնը: Բայց Գագիկ Հարությունյանը «հեռատես» լինելով, «դիվերսիֆիկացրել է» իր կապերը նաև ընդդիմության դաշտում: Ներկայիս ՍԴ նախագահը նաև Լևոն Տեր-Պետրոսյանի եղբոր խնամին է, բժիշկ Կամո Տեր-Պետրոսյանի դուստրը Գագիկ Հարությունյանի հարսն է:
Մնում է պարզել, թե ինչու՞ Գագիկ Հարությունյանը ազգակցական կապեր չունի «4-րդ հանրապետության 1-ին նախագահ» Արմեն Սարգսյանի ու ԲՀԿ առաջնորդ Գագիկ Ծառուկյանի հետ: Չէ որ նրանք էլ են այսօր կատարում առանցքային դեր: Կամ դա վտանգավոր քաղաքական «բացթողում է» Գագիկ Հարությունյանի կողմից, կամ էլ վերը նշված գործիչները ապագայում լուրջ դերակատարում, այնուամենայնիվ, չեն կարող ունենալ, և իզուր տեղը նրանց հետ բարեկամական կապեր հաստատել իմաստ չունի: Փաստորեն ստացվում է, անկախ ամեն ինչից, Գագիկ Հարությունյանի տեղը ցանկացած իշխանական կոնֆիգուրացիայի փոփոխության պարագայում «բրոնյա է» արված՝ անկախ սահմանադրական կարգից ու ձևից:
Սակայն ներկայիս ՍԴ նախագահն իր ամբիցիաների մեջ «համեստ է», քանզի շատ լավ հասկանում է, որ նույնիսկ այս բազմաբնույթ ու դիվերսիֆիկացված կապերի պարագայում էլ «մեծ» ամբիցիաներ ունենալը վտանգավոր է: Փաստը իր աչքի առաջ է, երբ բազմաթիվ խնամիական կամ քավոր-սանիկային հարաբերությունները առ ոչինչ են դառնում, երբ գործը հասնում է «մեծ խնդիրների» լուծմանը և «բամփոցը» դառնում է անխուսափելի:
Հակոբ Կարապետյան
Հետևեք մեզ Facebook-ում