Ինչու ՞ է Սերժ Սարգսյանը քաղաքական թատերաբեմ ներքաշում ապաքաղաքական մարդկանց
2016-ի սեպտեմբերին Սերժ Սարգսյանը վարչապետի պաշտոնին հրավիրեց մենեջեր Կարեն Կարապետյանին, ապրիլի 2-ի ընտրություններից հետո ԱԺ նախագահի պաշտոնին նշանակեց բժիշկ Արա Բաբլոյանին և ահա հիմա ՀՀ նախագահի պաշտոնին ցանկանում է տեսնել փաստացի բրիտանահայ Արմեն Սարգսյանին:
Պետք է ուշադրություն դարձնել այն հանգամանքի վրա , որ երեքն էլ խոր ապաքաղաքական գործիչներ են, բայց զբաղեցնում են երկրի բարձրագույն գլխավոր քաղաքական պաշտոնները:
Սերժ Սարգսյանը շատ լավ հասկանում է, որ այս մարդիկ կապ չունեն մեծ քաղաքականության հետ, դեռ ավելին, նրանք չեն էլ հավակնում զբաղվել քաղաքականությամբ: Բայց քանի որ, ինչպես ասում են, սուրբ տեղը դատարկ չի լինում, նրանց քաղաքական դերակատարումը փաստացի կկատարի հենց ինքը, ներկայիս գործող նախագահը, իհարկե քողարկված ձևով: Իսկ այս «հրաշալի եռյակը» պարզապես կկատարի քաղաքական «վիտրինայի» դեր հասարակության համար:
Բանն այն է , որ Գալուստ Սահակյանն ու Շարմազանովը այս եռյակից քաղաքական պատկերացումների տեսանկյունից մի քանի գլուխ բարձր են: Ինչպես ասում են, այս եռյակին «կարող են տանել աղբյուրի մոտ ու ծարավ հետ բերել»:
Սակայն հանրային ընկալման տեսանկյունից, ի տարբերություն Գալուստի ու Շարմազանովի , բժիշկ Բաբլոյանը, մենեջեր Կարապետյանն ու բրիտանահայ Սարգսյանը հակակրանք չեն առաջացնում: Դեռ ավելին, օրինակ, մի երկար ժամանակ մենեջերից մարդկանց մոտ լուրջ սպասում կար:
Այս որոշումներով Սերժ Սարգսյանը զգալիորեն թուլացրեց հասարակության նեգատիվ վերաբերմունքը իշխանության հանդեպ՝ լուծելով մի շարք տակտիկական հարցեր: Սակայն ռազմավարական տեսանկյունից իշխանության հանդեպ վստահության հարցը դեռ մնում է բաց: Իսկ դա նշանակում է, որ երկրի զարգացման հեռանկարը դեռ հստակ չէ, քանզի չի լուծված գլխավոր հարցը, իշխանության և պետության հանդեպ քաղաքական վստահության վերականգման հարցը մնացել է բաց, որի լուծումը գործող նախագահը դեռ չի գտել:
Արտակ Հակոբյան
Հետևեք մեզ Facebook-ում