Իրանը հայտարարել է Թուրքիայի հետ «Զանգեզուրի միջանցքի» շուրջ բանակցությունների մասին

Իրանական պատվիրակությունը շուտով կայցելի Թուրքիա այսպես կոչված «Զանգեզուրի միջանցքի» շուրջ բանակցությունների համար։ Այս մասին հայտնում է «Հետք»-ը, հղում անելով APA գործակալությանը, որի փոխանցմամբ այդ մասին այսօր կայացած ճեպազրույցի ժամանակ հայտարարել է Իրանի արտաքին գործերի նախարարության մամուլի խոսնակ Իսմայիլ Բաղային։

Իրանցի դիվանագետը նշել է, որ «Զանգեզուրի միջանցքը» ոչ թե քաղաքական հարց է, այլ, ավելի շուտ, տեխնիկական խնդիր, որն ունի երկու երկրների միջև շատ յուրահատուկ նշանակություն:

«Իրանն անփոփոխ դիրքորոշում ունի։ Իրանը ողջունում է տրանսպորտային ոլորտում համագործակցության ընդլայնումը, սակայն մենք ընդգծում ենք, որ երկրների ինքնիշխան իրավունքները պետք է հարգվեն»,- ընդգծել է Բաղային։

Նա հավելել է, որ իրանական պատվիրակությունը շուտով կայցելի Թուրքիա՝ «Զանգեզուրի միջանցքի» շուրջ բանակցություններով պայմանավորված: «Հնարավոր է, որ մոտ ժամանակներս մեր պատվիրակությունը համապատասխան կառույցների ներկայացուցիչների մասնակցությամբ այցելի Թուրքիա՝ այդ հարցը մանրամասն քննարկելու համար: Հուսով ենք, որ հարցը կլուծվի առաջիկայում»,- ընդգծել է նա։ 

Դեռ երկու տարի Թուրքիայի նախագահ Ռեջեփ Թայիփ Էրդողանը հայտարարել էր, որ «Զանգեզուրի միջանցքի» հարցով խնդիրը Հայաստանի հետ չէ, այլ՝ Իրանի։ «Այլ կերպ ասած՝ երկու մուսուլմանական երկրների խնդիր։ Այն փաստը, որ Իրանը այդ հարցով այդպիսի դիրքորոշում ունի, վրդովեցնում է և՛ Ադրբեջանին, և՛ մեզ»,- ասել էր Էրդողանը։

Այդուհանդերձ, 2023 թվականի հոկտեմբերից Բաքուն տարբեր մակարդակներով սկսեց հայտարարել, որ այլևս հետաքրքրված չէ Հայաստանի տարածքով միջանցքի բացման նախագծով ու պլանավորում է այդ նախագիծն իրականացնել Իրանի տարածքով։ «Այդ երթուղին մեզ համար կորցրել է իր գրավչությունը։ Նախագիծը մենք կարող ենք իրականացնել Իրանի հետ»,- հայտարարել էր Ադրբեջանի նախագահի արտաքին հարաբերությունների հարցերով օգնական Հիքմեթ Հաջիևը։

Նա նշել էր, թե Բաքուն պլաններ չունի ռազմական ճանապարհով գրավելու Սյունիքի մարզը։ «Մեր օրակարգը միայն երկկողմ փոխգործակցության շրջանակներում տրանսպորտային կապերի կառուցումն է։ Այս հարցը դեռ քննարկման փուլում է, բայց հայկական կողմից պահանջվելու է ցույց տալ, որ իրենք իսկապես շահագրգռված են դրանում»,- հայտարարել էր Հաջիևը։

--
Մեր կողմից նկատենք, որ երկու հարևան երկրները բանակցում են... Հայաստանի ինքնիշխան տարածքի տնօրինման շուրջ: 
Ի՞նչ է անում Հայաստանի իշխանությունը: Այն չափազանց զբաղված է ֆեյսբուքյան լայքեր, դիսլայքեր հաշվելով, որպեսզի զբաղվի նման «մանրուքներով», որոնց շուրջ բանակցում են օտարները, որոնցից Թուրքիան բացահայտ թշնամական երկիր է: