Իրական անեկդոտ. Ավինյանը՝ իր համար 7 մլն 650 հազ դրամի ավիատոմս գնելու մասին ասում է, թե... իրեն Նոր տարվա «վատ նվեր արվեց».

Փաշինյանի զինակից Ավինյանը երևի որոշել է մրցման մեջ մտնել իր կուսակցական «շեֆի» հետ: Ասում է, թե ինքը մեկ միլիգրամ անգամ չի իմացել, որ ԱՄՆ մեկնելու իր ավիատոմսը 7,6 միլիոն դրամ է արժեցել: Լո՞ւրջ:
Ինչպե՞ս կարող է որևէ մեկը չիմանալ (չնայել, չհետաքրքրվել), թե ինչ արժե իր ուղետոմսը: Երևի միայն մեկ դեպքում (սա էլ՝ մեծ վերապահումով). երբ դրա համար ուրիշն է վճարում, այս դեպքում՝ բյուջեն, ավելի ճիշտ՝ բյուջեից: Այսինքն, ստացվում է , որ բյուջետային ծախսերը Ավինյանի համար անկարևոր են: Ծախսը արվում է, հետո են նայում՛, թե որքան են ծախսել: 
Թույլ «կռուտիտ» է: Ավինյանը պարզապես տեսավ, որ ամեն կողմից այս աստղաբաշխական գնով ավիատոմսը «երեսով են տալիս», հիմա, իր կարծիքով, արդարանալու ձև է գտել: Տիպիկ ՔՊ-ական լինելով՝ մեղքն էլ բարդում է... իր աշխատողների վրա: 
Կարծես իրական անեկդոտ լինի, թեպետ՝ ամենևին ծիծաղելի չի: 
Panorama.am-ը գրում է. ««Վերջերս ԱՄՆ կատարած այցից հետո տեղեկացա, թե ինչ գնով են ձեռք բերվել ինձ համար նախատեսված տոմսերը։ Անկեղծ ասած, ես ինքս էլ մի փոքր ապշած էի այդ թվերից։ Հետո մի փոքր խորացա և հասկացա, որ ընդհանուր անպատասխանատվության և անտարբերության որոշակի խնդիր կա այստեղ»,-Երևանի քաղաքապետարանի գործակարգավարական խորհրդակցության ժամանակ ասաց Տիգրան Ավինյանը։

Նա հայտարարեց, թե պարզել է, որ նոյեմբերի 22-ի այցի համար տոմսերը ձեռք են բերել նոյեմբերի 20-ին։

«Անկեղծ ասած, եթե մեկ օր ուշացումով էլ ձեռք բերեին, կարող է կրկնակի կամ եռակի թանկ գնեին տոմսերը»,-տեղեկացրեց Ավինյանը և հավելեց. «Որոշում եմ կայացրել այդ ծախսն ամբողջութմաբ փոխհատուցել։ Կանխելով հետագա հարցերը, թե՝ ի՞նչ գումարներով, կառաջարկեմ ուսումնասիրել իմ հայտարարգիրը»։

Հետևանքները գնահատելու համար Ավինյանը քաղաքապետարանի աշխատակազմի քարտուղարի տեղակալ Վիլեն Արևշատյանին հանձնարարեց, որ իր գործուղման և տոմսերի գնման ընթացակարգի ժամանակագրությունը դուրս բերի, որպեսզի պարզեն, թե քաղաքապետարանից ով է եղել պատասխանատուն։

«Ես ինքս կառաջարկեմ,  թե ինչ պատասխանատվության պետք է ենթարկվեն այն մարդիկ, ովքեր պատասխանատու են»,-հայտարարեց Ավինյանը։

Նա հավելեց, որ դեպքը առիթ է տալիս խոսել «ժամանակին» թեմայի մասին։

«Ժամանակի գործոնը ճիշտ չգնահատելով՝ մենք մի իրավիճակի առջև հայտնվեցինք, որ ինձ Նոր տարվա  «վատ նվեր արվեց»։ Բայց, կարծում եմ, որ ամեն մեկն իր մասով պետք է հասկանա, թե ինչքան կարևոր է ժամանակին արձագանքել հանձնարարականին, մարդկանց դիմումների պատասխանը չձգձգել։ Եվ ամեն մեկը իր  մասով մարլբրի համակարգը բացի և տեսնի, թե ինչ ունի երկար ժամանակ քնեցրած, որովհետև այն ինչ-որ մի պահի, ինչ-որ մի վատ հետևանքի բերելու է»։