ՔՊ-ական Նաիրի Սարգսյանը ճիշտ է վերլուծում հարկային դաշտը, բայց վերջում սխալ հետևություն է անում

Այն, որ գալիք տարի Հայաստանում առաջ է գալու լուրջ սոցիալական լարվածության խնդիր, հասկանում են հանրության գրեթե  բոլոր շերտերը:

Դա վերաբերվելու է ոչ միայն շարքային քաղաքացիներին, այլև հանրության  առավել  մոբիլ հատվածին, որն համարվում է երկրի տնտեսության շարժիչ ուժը:

Խոսքը վերաբերում է բիզնեսի ներկայացուցիչներին:

Ընդ որում, պետությունից հարված են սպասելու ոչ միայն բիզնեսի խոշոր հատվածը, այլև միջին և նույնիսկ՝ փոքր բիզնեսի ներկայացուցիչները:

Այսպես. գալիք տարվանից, շրջհարկով գործող բիզնեսի ներկայացուցիչների հարկերը կբարձրանան երկու անգամ:

Սակայն դա էլ է քիչ, փոքր բիզնեսի մի շարք ոլորտներ ընդհանրապես կզրկվեն շրջհարկով աշխատելուց և իրենք ստիպված պիտի հայտնվեն ավելացված արժեքի հարկման դաշտում:

Մասնավորապես, կառավարությունը որոշել է այդպիսի հարկման ռեժիմ սահմանել ֆինանսական և իրավաբանական ոլորտներում գործող ընկերությունների համար:

Հասկանալի է, որ դրա հետևանքով այդ ընկերությունները կա՛մ պիտի փակվեն, կա՛մ էլ սկսեն աշխատել ստվերային դաշտում:

Այն, որ դա այդպես է լինելու, հասկանում են բոլորը, բացի Նիկոլ Փաշինյանից և իր կառավարության անդամներից:

Հետաքրքիր է, որ դա սկսել են հասկանալ նույնիսկ Փաշինյանի ՔՊ-ական թիմակիցները:

Այսպես. նրանցից Նաիրի Սարգսյանը, ով նախկինում Փաշինյանի օգնականն էր, իր ֆեյսբուքյան էջում հետևյալ գրառումն է արել.

«... ոչ մի կերպ չեմ կարողանում ընկալել, թե ինչու է ֆինանսների նախարարությունն անդրդվելի կերպով ցանկանում իրավաբան և հաշվապահ ԱՁ-ների և փոքր ընկերությունների հարկերը բարձրացնել 6 անգամ՝ 5%-ից դարձնելով 31,67%:
Ես այս թեմայով շատ մանրամասն ելույթ ունեցա ԱԺ-ի լսումների ժամանակ, որին ոչ մի հակափաստարկ չներկայացրեց նախագիծը զեկուցողը։ Ավելին՝ հաստատեց, որ իմ հաշվարկը ճիշտ է, թեպետ պարզ թվաբանական հաշվարկի ի՞նչը կարող է սխալ լինել:

Հիմա շատերը մտածում են, թե ես ինչու եմ դարձել ընդդիմադիր, իրականում ես չեմ ընդդիմադիրը, այլ ֆինանսների նախարար, իմ նախկին գործընկեր Վահե Հովհաննիսյանն է ընդդիմադիր: Այս փոփոխությունների միակ շահառուն ընդդիմությունն է, քանի որ մասնագիտական ծառայություն մատուցող հազարավոր քաղաքացիներ այս անարդար փոփոխությունից հետո այլևս չեն ընտրելու ՔՊ-ին:

Ես խոսել եմ փաստաբան և հաշվապահ իմ ընկերների հետ, որոնք մինչև հիմա աշխատել են 100%-ով սպիտակ դաշտում, նրանք ասում են, որ արդեն պայմանավորվել են իրենց հաճախորդների հետ, որ հաջորդ տարվանից փոխեն պայմանագրերը և գումարի մեծ մասը կանխիկ ստանան: Արդյունքում պետական բյուջե հավելյալ գումար չի մտնելու, բայց այս մարդիկ դառնալու են գող:

Մեջբերեմ վարչապետի խոսքը ԱԺ-ի ելույթից՝ «Պետությունից հարկ թաքցնողը և դրան ուղղված գործողություն անողը գողանում է զինվորից, գողանում է այն զինվորից, որը սահմանին կանգնած էե (06.12.2019թ)...»:

Վերջում, սակայն Նաիրի Սարգսյանը, որպես «փոխզիջում» առաջարկում է ոչ թե ընդհանրապես վերացնել շրջհարկը  այդ ոլորտի ընկերությունների համար, այլ մեծացնել  հարկի չափը հասցնելով այն մինչև 15 %:

Իհարկե, Նաիրի Սարգսյանի պարագայում նման առաջարկն էլ է «հերոսություն», ով գոնե հասկանում է, որ կառավարության այս որոշումը գրեթե ոչնչացնելու է այս ոլորտում աշխատող բիզնեսը:

Բայց պետք  է տխրեցնենք պարոն Սարգսյանին, քանի որ «ընդդիմություն է» դարձել, ոչ թե ֆինանսների նախարար Վահե Հովհաննիսյանը, այլ հենց Նիկոլ Փաշինյանը, ով վերջերս հայտարարեց, որ ընդհանրապես շրջհարկը ինքը համարում է «հակապետական հարկի տեսակ»:

Իսկ դա նշանակում է, որ 2018-ի դրական փոփոխությունների այն հույսերը, որոնք ուներ  մեր հանրության  գոնե  մի մասը,  վեց տարի անց արդեն ամբողջությամբ մարել են:

Քանի որ այդ փոփոխությունների իրական ընդդիմադիրը, ոչ թե Վահե Հովհաննիսյանն է, ինչպես ենթադրում է Նաիրին, այլ հենց Նիկոլ Փաշինյանն է, ով համարում է, որ երկրի փոքր բիզնեսը ընդհանրապես չպիտի ունենա հարկային արտոնություն:

Ինչպես ասում են՝ finita la commedia , և լավ է որ այդ ամենի մասին սկսել են հասկանալ նաև ՔՊ-ականներից շատերը:
Իսկ դա նշանակում է, որ երկրում գալիք փոփոխությունների ալիքը կարող է խաղաղ բնույթ կրել, և երկիրը չի հայտնվի նոր և վտանգավոր ցնցումների մեջ:

Սա է իրականությունը:

Արտակ Հակոբյան
Zham.am