Կոբախիձեն մեղադրում է ԵՄ-ի ղեկավարներին կեղծավորության մեջ, իսկ ընդդիմության ներկայացուցիչները հաստատում են իրենց գործակալ լինելը

Ինչպես հայտնի է, այս օրերին Հունգարիայի մայրաքաղաքում անցկացվում է այսպես կոչված՝ Եվրոպական խորհրդի ոչ պաշտոնական գագաթաժողովը, որին, ի դեպ մասնակցում են նաև Հայաստանի և Ադրբեջանի ղեկավարները:

Այս միջոցառմանն արևմտյան երկրները, բացի ԵՄ անդամ երկրների ղեկավարներից, պարբերաբար  հրավիրում են  նաև այդ միավորմանը  չանդամակցող երկրների ներկայացուցիչներին՝ փորձելով այդ երկրներում մեծացնել իրենց ազդեցությունը:

Հետաքրքիր էր, որ մինչ ամերիկյան ընտրությունները շատ եվրոպական  երկրների լիդերներ ուզում էին բոյկոտել այս գագաթաժողովը՝ ցույց տալով իրենց բացասական վերաբերմունքը Հունգարիայի վարչապետ Վիկտոր Օրբանի նկատմամբ:

Սակայն Թրամփի հաղթանակը այստեղ էլ իր շտկումները առաջ բերեց: Եվրոպական երկրները, ամերիկյան ընտրությունների արդյունքից հետո, ոչ միայն չբոյկոտեցին Օրբանին, այլև սկսեցին քծնել իրեն, քանի որ Եվրոպայում Թրամփի ամենահավատարիմ գործընկերը համարվում է հենց Օրբանը:

Այս խորհրդի աշխատանքներին եվրոպացի լիդերները խոստացել էին Վրաստանի ընդդիմությանը կոշտ դիրքորոշում ցույց տալ Վրաստանի ներկայիս վարչապետ Կոբախիձեին, ով նույնպես մասնակցում է  այս գագաթաժողովի աշխատանքներին:

Որպես նախաքայլ, Ֆրանսիայի, Գերմանիայի և Լեհաստանի ղեկավարները առանձին հայտարարությամբ հանդես եկան՝ ողջունելով Մոլդովայի ընտրությունները և քննադատըելով Վրաստանում անցկացված ընտրության արդյունքները:

Եվ ահա Կոբախիձեն պատասխան հայտարարությամբ հանդես եկավ, մեղադրելով եվրոպացի լիդերներին երկերեսանության մեջ:

Համեմատելով Վրաստանի և Մոլդովայի ընտրությունները Կոբախիձեն նշեց հետևյալը.

«Մոլդովան մի երկիր է, որտեղ Մոլդովայի բնակչության միայն 45%-ն է ուղղակիորեն աջակցում Եվրամիությանն ինտեգրմանը։ Մոլդովան ԱՊՀ անդամ է, Վրաստանում բոլորովին այլ պատկեր է…»:

Վրաստանի վարչապետը նաև կասկածի տակ է դրել նախագահական ընտրությունների և ԵՄ-ին անդամակցելու հանրաքվեի  իրական  արդյունքները, որոնք վերջերս անցկացվեցին Մոլդովայում։

«Մոլդովայի ընտրություններում   քվեատուփը թափանցիկ է եղել, և քվեաթերթիկը առանց  ծրարի էր նետվում այդ  քվեատուփի մեջ, և դա զանգվածային բնույթ ուներ:  Այսինքն,  Մոլդովայում ընդհանրապես քվեարկության գաղտնիություն չի եղել»,- նշել  է Կոբախիձեն։

Արևմտյան և վրացի փորձագետների կարծիքով՝ Կոբախիձեն իրեն ավելի վստահ էր զգում Բուդապեշտում, հատկապես ամերիկյան ընտրություններևից հետո, քանի որ ԱՄՆ-ում հաղթեց Թրամփը:

Իր  հերթին, վրացական ընդդիմադիր գործիչները, հաշվի առնելով Թրամփի գործոնը, սկսել են Իվանիշվիլու թիմին մեղադրել, որ Թբիլիսին լավ հարաբերություններ է հաստատել Չինաստանի և Իրանի հետ:

Մասնավորապես, ընդդիմության ներկայացուցիչ  Թինաթին Խիդաշելին մեղադրել է իշխանություններին, որ վերջիններս զգալիորեն բարելավել են Վրաստանի հարաբերությունները Իրանի հետ և ռազմավարական բնույթի հարաբերությունների համաձայնագիր են կնքել Չինաստանի հետ, որի արդյունքում Վրաստանը ստացել է չինական բազմամիլիարդանոց ծրագրերի փաթեթ:

Խիդաշելիի ցանկությունն է, որ ներկայիս Վրաստանի իշխանություններին չհաջողվի վերականգնել Թրամփի հետ հարաբերությունները, նշելով, որ ընդդիմությունը պիտի ընդգծի  այդ հանգամանքները, որոնք իրենց հերթին թույլ չեն տա, որ Թրամփը «բարի աչքով»  դիտարկի Իվանիշվիլու թիմին:

Դրանից հետո նույնիսկ «գործակալների»  մասին օրենքն էլ պետք չէ, քանզի գործակալները իրենց հայտարարությամբ ապացուցում են, թե իրենք իրականում ում շահերն են սպասարկում:

Պետք է նշել, որ գործակալները, իրականում  ազգություն չեն ունենում, որովհետև, իրենք Հայերինիքի զգացումը չեն ունենում:

Այդ իսկ պատճառով էլ գործակալների գործնեությունից զարմանալ պետք  չէ: Հենց այդ նույն պատճառով ազդեցիկ երկրները, ներառյալ ԱՄՆ-ն ընդունել են հատուկ օրենքներ, որպեսզի ապահեվեն իրենց երկրների անվտանգությունը օտար երկրների ազդեցությունից: Ամերիկյան FARA/ The Foreign Agents Registration Act/ կոչվող օրենքը, ամենախստագույններից է այս շարքում:

Եվ բոլոր այն երկրները, որտեղ այդ օրենքները փաստացի չեն գործել, հայտնվել են ծանր վիճակներում:

Սա է իրականությունը:

Դավիթ Մկրտչյան
Zham.am