Անկարան, Բաքուն, Բրյուսելը խաղում են «պասերով», որպեսզի կործանեն Հայաստանը, թուրքական ԱԳՆ-ն, իբր, դատապարտում է

Թուրքիան դատապարտում է ԵՄ-ԱՄՆ-Հայաստան եռակողմ հանդիպումը․ այն հարված կհասցնի չեզոքության մոտեցմանը, որը պետք է հիմք ընդունվի տարածաշրջանում բարդ խնդիրների լուծման համար։ Ինչպես հաղորդում է 168.am-ը, այս մասին հայտարարություն է տարածել Թուրքիայի ԱԳ նախարարութունը։

«Տարածաշրջանը շատ մոտ է նրան, որ այդ պատմական հնարավորությունը հաջողությամբ պսակվի: Այս առումով առավել քան երբևէ կարևոր է, որ երրորդ երկրները, մասնավորապես ոչ տարածաշրջանային, այս գործընթացին մոտենան արդար և անաչառ՝ զգուշորեն խուսափելով առաջընթացի հասնելուն խոչընդոտող գործողություններից»:

Թուրքիայի ԱԳՆ-ն ընդգծել է, որ Բրյուսելում նախատեսված եռակողմ հանդիպումը հակասում է չեզոքության սկզբունքին, որը պետք է հիմք ընդունել տարածաշրջանային վեճերը լուծելու համար։
«Այդ նախաձեռնությունը, որն անտեսում է Ադրբեջանի դիրքորոշումը, միայն հիմք կստեղծի նոր աշխարհաքաղաքական տարաձայնությունների համար Հարավային Կովկասում։
Անկարան ևս մեկ անգամ կոչ է անում երրորդ երկրներին հետագա գործողություններում հաշվի առնել տարածաշրջանի առանձնահատկությունները և հավասար դիրքորոշում պահպանել կողմերի նկատմամբ»։
---
Մեր կողմից հավելենք, որ ինչպես Անկարայի այս «դատապարտիչ» հայտարարությունը, այնպես էլ՝ Ալիևի՝ Արևմուտքի հետ հարաբերություններում «խորոզանալը» (Բլինքենի հետ զրույցը), ներառյալ՝ Բրյուսելից ու Վաշինգտոնից հնչող արտահայտությունները, թյուրք-ադրբեջանական տանդեմին ուղղված «հանդարտեցնող» ձևակերպումները լավ կազմակերպված խաղի, ավելին՝ «պասերով» խաղի տպավորություն են թողնում: 
Այն իմաստով, որ Արևմուտքն անում է մի բան, որին, իբրև թե... դեմ են Անկարան ու Բաքուն: Իրականում թե՛ Բաքուն, թե՛ մանավանդ Անկարան բացառապես շահում են Հայաստանն Ռուսաստանից կտրելու հնարավորությունից, ինչը Փաշինյանի բրյուսելյան այցի առանցքային, եթե ոչ՝ անկյունաքարային նպատակն է: 
Տվյալ դեպքում Հայաստանը, որպես պետություն (դեռևս) այդ խաղում ոչ թե չկա, այլ սոսկ «գնդակի» դերում է: 
Ի դեպ, հիշեցնենք, որ Արցախի բռնազավթման, հայության դեմ 21-րդ դարում ցեղասպանություն իրականացնելու նախօրեին բոլոր դերակատարները «ճշտող» հանդիպում են ունեցել Թուրքիայում: Որից հետո էլ իրականացվել է Արցախի բնիկ ժողովրդի՝ հայության ցեղասպանություն-տայրենազրկումը: Ավելին, Էրդողանը հայտարարել է, որ պաշտոնական Երևանը տեղեկացված է եղել վերոնշյալի մասին, իսկ «պաշտոնական Երևան» համարվող փաշինյանական ռեժիմը այդպես էլ համոզիչ հերքում չի ներկայացրել իր՝ նախապես տեղեկացվածության մասին: 
Արցախի հայաթափումը մարսելուց հետո, անխուսափելիորեն, սկսվել է Հայաստանի ոչնչացման թյուրքական ծրագրի իրականացումը: Թերևս հայ մարդկանց կարիք չկա բացատրել, թե ինչու է ապրիլն ընտրվել որպես դեպքերի բուռն զարգացման հնարավոր ժամնակահատված:
Կարելի էր շատերի նման վերջում նշել. «մտածեք», բայց դա անիմաստ է, քանի որ մտածելու ժամանակ, որպես այդպիսին, արդեն գրեթե չկա: Գործելու ժամանակ դեռ կա: Մի քիչ: 

Արմեն Հ. 
 Zham.am