Փաշինյանը, առավոտ կանուխ, թիկնազորի ուղեկցությամբ, ծաղիկներ է դրել ու խաչակնքել մարտի 1-ի զոհերի հուշարձանի մոտ

Փաշինյանը ֆեյսբուքի իր էջում հրապարակել է կարճ տեսանյութ, որտեղ երևում է, թե նա ինչպես է թիկնազորի ուղեկցությամբ, առավոտ կանուխ, միայնակ, մոտենում մարտի 1-ի զոհերի հուշարձանին: Երևում է, որ «ախռանան» նախապես «մաքրել» է տարածքը, որպեսզի «ավելորդ դեմքեր» այնտեղ չլինեն: 
Փաշինյանը մի փունջ բոսորագույն վարդեր է դնում հուշարձանին, ապա խոնարհման ժեստ է անում, որից հետո նաև խաչակնքվում է:
Հավելենք, որ 16 տարի առաջ, 2008-ի մարտի 1-ին, նաև Նիկոլ Փաշինյանի արկածախնդիր և հրահրիչ կոչերի ու պահվածքի հետևանքով տեղի ունեցան զանգվածային անկարգություններ, որոնք վերաճեցին ոստիկանության ու ներքին զորքերի հետ բախումների: Հետևանքը. զոհվեցին ոստիկանության զորքերի երկու զինծառայող և 8 քաղաքացիական անձ: Ողբերգական դեպքերից հետո Նիկոլ Փաշինյանը փախավ դեպքի վայրից ապա միառժամանակ պատսպարվեց թաքստոցում կամ «ընդհատակում»: Հետագայում «հանձնվեց» իրավապահներին, դատվեց, դատապարտվեց, բայց ԱՄՆ և այլ արևմտյան տերությունների ճնշմամբ, նախկին իշխանությունների հայտարարած համաներման տարբերակով, հայտնվեց ազատության մեջ: 
Նիկոլ Փաշինյանի քաղաքական «մշտաթեմաներից» մեկը դարձավ «մարտի 1-ի  բացահայտումը», որը նա խաղարկեց նաև իշխանությունը 2018-ին «փողոցային հեղաշրջման» միջոցով վերցնելուց հետո: «Մարտի 1-ի» այսպես ասած՝ «նոր գործը» արդեն ՀՀ ղեկավարի պաշտոնը կրող Փաշինյանի համար դարձավ քաղաքական հետապնդումներ իրականացնելու «գործիք»: Բայց, չնայած բացարձակ իշխանությանը, չնայած կամակատար քննչական ու դատական լծակներին, չնայած քննությանն ու դատավարությանը միջամտելուն (գաղտնալսման հայտնի սկանդալը), ոչ մի «բացահայտում» էլ տեղի չունեցավ, փաշինյանական իշխանության, Փաշինյանի հոխորտալից մեղադրանքներն էլ, հասկանալի է, չհաստատվեցին: 
Սակայն դա չի խանգարում, որ 2008-ի մարտի 1-ի ողբերգությունը շարունակի մնալ Փաշինյանի ու նրա կողմնակիցների քաղաքական ու քարոզչական «գործիքացանկում»: Եվ, եթե նախորդ տարիներին Փաշինյանը ՔՊ-ականների շարասյունով էր ծաղիկներ դնում, այս տարի մեն-մնակ եկավ, եթե չհաշվենք թիկնազորքի անվտանգության աշխատակիցներին: 
Zham.am