«Խաղաղության խաչմերուկի» «չոր նավահանգիստը»

Քանի որ Նիկոլ Փաշինյանը որոշել է, որ Հայաստանը պետք է դառնա «խաղաղության խաչմերուկ», նրա ենթականերն էլ ճգնում են հետ չմնալ իրենց ղեկավարից ու փայլատակել զանազան-զարմանազան թռիչքներով: Հասկանալի է, խոսքը մտքի ու երևակայության թռիչքների մասին է:
Նախօրեին իր մասին հիշեցրեց Փաշինյանի կաբինետի անզուգական անդամներից մեկը, ինչպիսին է բոլոր ժամանակների տնտեսագիտաց տնտեսագետ, էկոնոմիկայի նախարար Վահան Քերոբյանը, որը ոչ այն է հիշել է, ոչ այն է՝ իրեն հիշեցրել են Գյումրիում «չոր նավահանգտսհ» կառուցելու ծրագրերի մասին: Վահան Քերոբյանն էլ լրագրողներին ասել է, որ Գյումրիում չոր նավահանգիստ կառուցելու հետ կապված այժմ իրագործման ընթացքում է խորը տեխնիկատնտեսական վերլուծությունը, որն անում է հոլանդական ընկերություն:
Քերոբյանն ասել է. «Ըստ պլանի՝ մինչև տարվա վերջ կունենանք վերջնական զեկույցը, և ըստ պլանի՝ հանրային ներդրումային կոմիտեն ևս մեկ անգամ պետք է որոշում կայացնի այդ ծրագրի շարունակելու և համապատասխան ներդրումներ անելու վերաբերյալ»:
Այստեղ «բանալի» բառերը մի քանիսն են: Կարևորը պլանն է և այն, որ այդ պլանը հոլանդական է, այսինքն՝ հոլանդական ընկերություն է այն մշակում: Հոլանդիայում, ինչպես հայտնի է, շատ են սիրում պլաններ մշակել, և շատերի կարծիքով՝ նրանց մոտ վատ չի ստացվում:
Ու, գիտեք, ի տարբերություն կառավարության ղեկավարի, նրա էկոնոմիկայի նախարարի խոսքը ավելի շատ վստահություն է ներշնչում: Այն առումով, որ դեկտեմբերի վերջին «չոր նավահանգստի» համար ներդրումների հարցեր են քննարկելու: Դրանից կարելի է բխեցնել, որ մինչև դեկտեմբերի վերջ Հայաստանը լինելու է, իսկ Գյումրին էլ Ադրբեջանին հանձնած չեն լինելու: Թերևս արժե, որ Գյումրիում սկսեն «ցամաքային նավաստիներ» պատրաստելու ծրագիր իրականացնել: Հակառակ դեպքում, առանց նավաստիների, ի՞նչ նավահանգիստ: Եվ եթե նավահանգիստը չոր է, ապա նավաստիներն էլ պիտի ցամաքային լինեն:
Առհասարակ, անհասկանալի է, թե նախկինում գործածվող երկաթուղային կամ տրանպորտային հանգույց բառակապակցությունն ինչո՞վ դուր չի գալիս նորընծա պարգևավճարյալ չինովնիկներին, որ նոր «տերմիններ» են հորինում: «Չոր նավահանգիստ», լրիվ «երջանիկ դժբախտություն» կամ՝ «խորանարդ գունդ»:
Ի դեպ, Քերոբյանի գաղափարակից, նախկին նախարար, հիմա ԱԺ փոխխոսնակ Արշակյանն էլ նախօրեին հայտարարել է, թե ԲՏ ոլորտում Հայաստանն աշխարհում  մրցակից չունի: Իսկ ով կասկածում է... կարող է փետրվարի 31-ին այցելել ԲՏ ոլորտում Հայաստանի նվաճումների ցուցահանդես:
Ա.Հ.
Zham.am