Ֆրանսիան զգոն է, հայ ժողովրդի կողքին է, բարեկամ է և այլն. ի՞նչ ասաց Ֆրանսիայի ԱԳ նախարարը

Հայաստան ժամանած Ֆրանսիայի ԱԳ նախարար Կատրին Կոլոննան հանդիպումներ է ունեցել Նիկոլ Փաշինյանի ու Արարատ Միրզոյանի հետ: Վերջինիս հետ հանդիպմանը հաջորդած մամուլի ասուլիսում Կատրին Կոլոննան մի շարք հայտարարություններ է արել, որոնցից առավել հետաքրքրական են հետևյալները:
Նախ՝ դեռևս շատ հստակեցումներ պետք է արվեն, բայց Ֆրանսիան համաձայնել է Հայաստանի հետ ապագայում կնքել պայմանագիր, որը  ռազմական տեխնիկա տրամադրելու հնարավորություն կտա:
Ե՞րբ, ինչպե՞ս, որքա՞ն, ի՞նչ, բնականաբար, անհայտ է:
Երկրորդը՝ Կատրին Կոլոննան հայտարարեց, որ պաշտոնապես դիմել է ԵՄ ներկայացուցիչ Ժոզեպ Բորելին՝ «եվրոդիտորդների» առաքելությունն ընդլայնելու և մանդատը հզորացնելու համար, գումարած՝ Հայաստանը «Խաղաղության Եվրոպական մեխանիզմի» մեջ ներառելու համար: Ֆրանսիայի ԱԳ նախարարը իշել է, որ ցանկացած գործողություն, որը կսպառնա ՀՀ տարածքային ամբողջականությանը, շատ հստակ և կոշտ արձագանքի կարժանանա։ Բայց այստեղ էլ հույսը փոխանցում է, օրինակ, ԱՄՆ-ի վրա:
Թե այդ ի՞նչ «կոշտ արձագանք» է լինելու, պարզորոշ ցույց տվեցին ՄԱԿ-ի «առաքյալները», որոնք հայտարարեցին, որ հայաթափված Արցախում ամեն ինչ ուղղակի հրաշալի է, հիասքանչ ու աննման, միայն անհասկանալի է, թե ո՞ւր են հեռացել բնակիչները և՝ ինչո՞ւ: Շատ «հզոր» արձագանք էր, որի համար Ալիևը ՄԱԿ-ի գրպանը 1 մլն դոլար խոթեց: 
Երրորդը՝ Ֆրանսիան կարծում է, որ Ռուսաստանը չի հարգել 2020 թվականի նոյեմբերի 9-ի համաձայնությամբ ստանձնած իր պարտավորությունները։ Մասնավորապես, Կոլոննան հայտարարեց, որ Ռուսաստանը պետք է ապահովեր, որ հնարավոր լիներ հարցերը լուծել քաղաքական ճանապարհով և լուծեր երկու երկրների միջև եղած խնդիրները, այսինքն՝ դա Ռուսաստանի իր պարտավորությունն էր, որը չի կատարվել, ըստ Ֆրանսիայի ԱԳ նախարարի: 
Կատրին Կոլոննան նաև հիշատակեց Ֆրանսիայի ու Մակրոնի ջանքերի մասին, մասնավմրապես. «Ֆրանսիան շատ զգոն կլինի մեր բարեկամ երկրի՝ Հայաստանի տարածքային ամբողջականության նկատմամբ: Մենք խոսել ենք ՀՀ վարչապետի հետ. ուղիղ մեկ տարի առաջ Ֆրանսիայի նախագահը Պրահայում հանդիպում ունեցավ վարչապետ Փաշինյանի և նախագահ Ալիևի հետ, դրա արդյունքը կարելի է ասել հիմքն է, որ ծառայեց մեր հետագա ջանքերին, եզրակացություններից մեկը փոխադարձ տարածքային ամբողջականության ընդունումն էր Ալմաթիի հայտարարության հիման վրա: Կարծում եմ` սա կարևոր առաջընթաց է, որը պետք է պահպանել և առաջ գնալ: Մենք ձեր կողքին ենք` բոլոր նրանցով, որ կիսում են զգացողությունը, որ այս պարտավորությունը պետք է հարգվի»:
Իսկ սա արդեն եվրոպական ու քաղաքական երեսպաշտության ու երկերեսանիության կամ աներեսության քրեստոմատիկ դրսևորում կարելի է համարել: Կատրին Կոլոննան, երևի Նիկոլ Փաշինյանի ու Արարատ Միրզոյանի օրինակներն ունենալով, կարծում է, թե Հայաստանում բոլորն են այդպիսին: Հարցն այն է, որ Արցախի ամբողջական հայաթափման, Արցախի հայության բնաջնջման ու ադրբեջանականացման ընթացիկ ողբերգության հանգուցային կետը հենց նշված Պրահայի հանդիպումն էր, որտեղ Փաշինյանն ուրացել է Արցախը՝ դրանից բխող ու այս օրերին դրսևորված աղետային հետևանքներով: 
Իսկ երկերեսանիություն է Կոլոննայի ասածը, որովհետև նա չի կարող չհասկանալ, որ  իրենց միջնորդությամբ եղած Պրահայի հանդիպումը ուղղակիորեն ոռոչինչ է դարձրել 2020թ. նոյեմբերի 9-ի հայտարարությունը՝ Ռուսաստանի պարտավորություններով հանդերձ: Բայց հիմա Ռուսաստանի դեմ է ուղղում սլաքները, տպավորություն ստեղծելու համար, թե ԵՄ-ն ու Ֆրանսիան, իբր, անմասն են Արցախի ու հայության գլխին ջարդված աղետից, այն դեպքում, երբ ուղղակիորեն կանգնած են դրա ակունքներում: 
Թերևս պետք է գոհ լինենք, որ Ֆրանսիայի ԱԳ նախարարը ընդունում է փաստը, որ Արցախի հայերը ինքնակամ չեն լքել իրենց բազմահազարամյա բնօրրանը, տները, բնակավայրերը, հայրենիքը: 
Եվ վերջինը՝ Փաշինյանի հետ հանդիպմանը նշվել է, որ Ֆրանսիան Հայաստանին մի 12,5 միլիոն եվրոյի մարդասիրական օգնություն կտա: 
Լուսանկարը՝ կառավարության կայքից