Զինվորների օգնության անվան տակ փողե՞ր են «լվացվում»

«Հայրենասեր» հասարակական կազմակերպության հիմնադիրներից Ստեփան Սարգսյանն օրերս բարձրաձայնել էր զինվորների անունով հավաքվող գումարների մասին, որոնք հաճախ նպատակային չեն օգտագործվում: Նա սոցիալական ցանցի իր էջում, մասնավորապես, գրել էր.

«Զոհված հերոսների ընտանիքներին օգնելու անվան տակ որոշ մարդիկ ՓՈՂ ԵՆ ԱՇԽԱՏՈւՄ։ Ո՞նց մեր մտքով սա չէր անցել (Խոսքը supportarmenia.org-ի դրամավաքի մասին է): Փաստորեն զոհված զինվորի անվան տակ դրամահավաք են անում, որ սփյուռքյան բիզնեսները ծաղկեն, բարգավաճեն։ Իսկ էս մի ծախսը լրիվ ապշեցնող է։ 4 ամիս օֆիսի վարձակալության համար $6800 փող եք ծախսել։ Էդ ի՞նչ էիք վարձել, ո՞րտեղ և ինչու՞՞՞։ Մի հատ գարաժ կամ մեկիդ տանը մեծ հյուրասենյակ չէի՞ք կարողանում գտնել։ Ամիսը $1700՞։ Ավելի էժան տեղ չկա՞ր։ Ու էդ ո՞ր սրբություն չունեցող հայն ա զոհված զինվորի փողից 4 ամսվա վարձակալության համար $6800 գումար վերցրել։ Իսկ էդ $4700-ի misc. ո՞րն ա։ $140 «շատ մեծ» ծախսը հիշել գրել եք, բայց $4700-ի «մանր-մունր» ծախսերը չեք հիշե՞լ (տե՛ս կից տվյալները՝ լուսանկարի տեսքով)»:

«Հայրենասերի» հիմնադիրների բարձրացրած այս խնդիրն իսկապես մտահոգիչ է և նոր գունեղ երանգներ է ստացել հատկապես ապրիլյան քառօրյա պատերազմից հետո: Դրամաշնորհների, դրամահավաքների և այլ հավաքների մեջ «մասնագիտացած» բազմաթիվ անձինք ու կազմակերպություններ հայտնվեցին, որոնք զինվորներին, նրանց հարազատներին ու տուժած բնակավայրերին օգնություն տրամադրելու անվան տակ սկսեցին սեփական խնդիրները լուծել:

Հիմա կասեք, թե գումար փոխանցողներն են մեղավոր, որ առանց լրացուցիչ ճշգրտումների իրենց գումարը նվիրաբերում են: Իրականում, մարդը, երբ ցանկանում է նվիրաբերություններ կատարել, հաճախ դա տրամադրում է ոչ թե առավել հայտնի ֆոնդերին, այլ օնլայն դրամահավաքչությամբ զբաղվողներին: Դրա համար պետք չէ գումար փոխանցողին մեղադրել, քանի որ հիմնադրամները ևս վաղուց անվստահելի են դարձել շատ շատերի համար՝ նույն պատճառով: «Մարտիկ» հիմնադրամը դրա վառ օրինակն է և միակը չէ:

Կարճ ասած, Հայստանի իշխանությունները պետք է նախևառաջ մտածեին ոչ թե մարդկանց աշխատավարձերից 1000-ական դրամ պահումներ անելու մասին, այլ արդյունավետ մեխանիզմներ մշակեին առկա ռեսուրսները հնարավորինս նպատակային օգտագործելու համար:

Հասմիկ Գրիգորյան