Մարտակերտի շրջանում արձանագրվել է հրադադարի ռեժիմի մեկ խախտում, հայկական կողմում կա վիրավոր. ՌԴ ՊՆ

Արցախում տեղակայված ռուսական խաղաղապահ զորախումբը Մարտակերտի շրջանում հրադադարի ռեժիմի խախտում է արձանագրել։ Ինչպես նշված է ՌԴ ՊՆ տեղեկատվական տեղեկագրում, միջադեպի հետևանքով հայկական կողմն ունի մեկ վիրավոր։ «Մարտակերտի շրջանում արձանագրվել է հրադադարի ռեժիմի մեկ խախտում։ Հրետակոծության հետևանքով վիրավորվել է Լեռնային Ղարաբաղի զինված կազմավորման մեկ զինծառայող:

Ռուսական խաղաղապահ զորախմբի հրամանատարությունը ադրբեջանական և հայկական կողմերի հետ հետաքննություն է անցկացնում փաստի առնչությամբ»,- ասվում է հաղորդագրության մեջ։ Նշվում է նաև, որ ռուս խաղաղապահները չորս երթուղիներով պարեկել են Բերձորի, Մարտակերտի (երկու երթուղի) և Մարտունու շրջաններում։ Ռուս խաղաղապահների անվտանգությունն ապահովելու և հնարավոր միջադեպերը կանխելու համար շարունակական փոխգործակցություն է պահպանվում Ադրբեջանի և Հայաստանի զինված ուժերի գլխավոր շտաբների հետ։