Պահանջված մասնագիտություն. Լուսանկարներ

Ստանալ բարձրորակ կրթություն և ունենալ պահանջարկված մասնագիտություն, նույնն է թե ծնվել ժամանակին և ճիշտ տեղում: Ճարտարապետության և շինարարության Հայաստանի ազգային համալսարանի (ՃՇՀԱՀ ) քաղաքային տնտեսության և էկոլոգիայի ֆակուլտետի տրանսպորտային համակարգեր կրթական ծրագրի ( մասնագիտության) շրջանավարտները աշխատաշուկայում մեծ պահանջարկ ունեն: Դա պատահական չէ, քանի որ շրջանցող և նոր ճանապարհների, ճանապարհային երթևեկության, լուսաֆորների աշխատանքի, քաղաքի բեռնաթողության ճիշտ հաշվարկի և նման այլ լրջագույն հարցերն են լուծում տրանսպորտային համակարգերի մասնագետները: Իհարկե այս ամենը կարևոր հարցեր են, սակայն ապագա ուսանողներին ավելի շատ հետաքրքրում է թե ին՞չհնարավորությունէընձեռնում տրանսպորտային համակարգեր մասնագիտությունը ուսանողներին ավարտելուց հետո՝ որտեղ կարող են աշխատել։ Այս և այլ հարցերի շուրջ զրուցեցինք ՃՇՀԱՀ-ի քաղաքային տնտեսության և էկոլոգիայի ֆակուլտետի դեկան Վալերիյ Հարությունյանի հետ։

-  Մեր շրջանավարտները գործունեություն են ծավալում հետևյալ բնագավառներում՝ ՀՀ Տարածքային կառավարման և ենթակառուցվածքների նախարարությունում, քաղաքապետարանի տրանսպորտի վարչությունում, ՀՀ Արդարադատության նախարարության ՃՏՊ փորձաքննությունների բաժնում, ՀՀ Ներքին գործերի նախարարության համակարգում, Փորձաքննությունների ազգային բյուրոյում, ԱՊՊԱ գործակալություններում, Ավտոմոբիլային ճանապարհների, փոխադրումների կազմակերպման համակարգերի, ճանապարհային երթևեկության կազմակերպման և կառավարման տարբեր բնագավառներում։

Մեր համալսարանը կրթում և պատրաստում է տրանսպորտային համակարգերի ճարտարագետներ, ովքեր կիրառելով գիտության  և տեխնիկայի առաջավոր մեթոդները, հաջողությամբ կարող են իրականացնել ճանապարհափողոցային ցանցի երթևեկության կազմակերպում, քաղաքային ճանապարհափողոցային ցանցով ավտոմատ կառավարման համակարգերի նախագծում, ճանապարհատրանսպորտային  պատահարների փորձաքննություն, ուղևորափոխադրումների լոգիստիկ կազմակերպում:

«Տրանսպորտային համակարգեր» մասնագիտության կրթական ծրագիրը համապատասխանեցվել է ժամանակակից պահանջներին և աշխատաշուկայի կարիքներին, ներդրվել են նոր առարկաներ, որի նպատակն է բարձրակարգ մասնագետների պատրաստումը և ակնկալվող վերջնաարդյունքները մոտեցվեն գործատուների պահանջներին, նպաստեն առկա հիմնախնդիրների լուծմանը:

 -    Ինչու՞ է այս մասնագիտությունը պահանջարկված։

-   ՀՀ-ում տրանսպորտային հաղորդակցությունների ապահովման առաջատար դերը պատկանում է ավտոմոբիլային տրանսպորտին՝ տրանսպորտի միակ տեսակին, որն ապահովում է կապը հանրապետության լեռնային և հարթավայրային մասերի միջև, ինչպես նաև բեռների և ուղևորների մեծածավալ միջպետական փոխադրումներն իրականացվում են ավտոմոբիլային տրանսպորտով, որտեղ անհրաժեշտ է տրանսպորտային համակարգեր մասնագիտությամբ լոգիստիկ կառավարման հմտություններ և գիտելիքներ:

Երևան քաղաքի ճանապարհափողոցային ցանցի վրա անընդհատ են դարձել տրանսպորտային հոսքերի խճողումային և խցանումային իրավիճակները: Այդ առումով, ճանապարհափողոցային ցանցի թողունակության բարձրացման, երթևեկության կազմակերպման և կառավարման բարելավման նպատակով՝ առաջադրանքների լուծման համար անհրաժեշտ է մեր մասնագետների գիտական և գործնական ներուժը:

Ամբողջ աշխարհում սոցիալական սուր հիմնախնդիրներից մեկն է հանդիսանում ավտոճանապարհների վթարայնության բարձր մակարդակը, ճանապարհատրանսպորտային պատահարներից մշտապես աճող զոհերի և վիրավորների թիվը, որն էականորեն ազդում է երկրի տնտեսական զարգացման վրա:

Վերջին տարիներին ՀՀ-ում ճանապարհային երթևեկության մասնակիցների տրավմատիզմի վիճակը (զոհեր և վիրավորներ), և ընդհանուր բացասական դինամիկան հիմք են հանդիսացել, որ երթևեկության անվտանգությունը դասվի պետական նշանակության կարևորագույն հիմնախնդիրների շարքին, ընդ որում դրանց լուծման համար որակյալ մասնագետների մեծ պահանջարկ կա:

-  Ունե՞ք ուսումնասիրություն թե ավարտելուց հետո շրջանավարտների քանի տոկոսն է աշխատում իր մասնագիտությամբ։

- Առկա ուսուցման շրջանավարտների մոտ 90%-ը աշխատում են իրենց մասնագիտությամբ և իրենց գործունեության ոլորտում գրանցել են մեծ առաջընթաց:

- Ճանապարհային ոստիկանության հետ համագործակցում ե՞ք կադրերի պատրաստման, վերապատրաստման ուղղությամբ։

- Ճանապարհային ոստիկանության հետ համագործակցությունը կայանում է երթևեկության կազմակերպման հիմնախնդիրների լուծման և միջոցառումների մշակման քննարկումների ժամանակ։

-  Ինչ՞ը Դուք կկարևորեիք։

- Համալսարանի ռազմավարական ծրագրում կարևորված է կրթության որակի բարձրացմանը, ինչը այսօր անհնար է առանց  բարձրակարգ սարքավորումներով հագեցված լաբորատորիաներով և տարբեր ծրագրերի խորը ուսումնասիրությամբ։ Նոր ժամանակակից տրանսպորտային համակարգերի լաբորատորիաների ստեղծումը անընդհատ և շարունակական գործընթաց է։ Այդ լաբորատորիաները բացի ուսումնական գործընթացից կիրառելի են փորձարարական և գիտապրակտիկ գործունեության ծավալման համար և այդ մասնագիտության ուսանողները իրենց տեսական գիտելիքները գործնականում կիրառելու հնարավորություն կունենան: Ի դեպ պետք է ընդգծեմ, որ համալսարանի ռեկտոր Եղիազար Վարդանյանի նախաձեռնությամբ նախատեսված ուսումնական կրթական ծրագրերից բացի մեր ուսանողների համար իրականացվում է լրացուցիչ տարբեր համակարգչային ծրագրերի և օտար լեզուների ուսուցում՝ անվճար հիմունքներով։

Ժասմեն Վիլյան