Երևանը ջրհեղեղի վտանգի առջև է. պատկան մարմիններն անհանգստացած են (PHOTO)

Եղանակային առատ տեղումների հետևանքով լուրջ խնդիրներ են առաջացել Գետառ և Հրազդան սելավատարների և Երևանի սելավընդունիչների բնականոն աշխատանքի հետ:

Եթե այս առատ տեղումներից հետո եղանակը կտրուկ տաքանա, գործող սելավահեռացման համակարգը պարզապես չի հասցնի իր ֆունկցիան կատարել և հեղեղումները կծածկեն քաղաքի զգալի հատվածը: Խոսքը ոչ միայն տարիներ առաջ մասամբ փակված Գետառի մասին է, այլև Հրազդանի:

Մեր ունեցած տեղեկություններով հարցը քննարկվել է նաև պետական կառույցներում, այդ թվում և՝ Բնապահպանության նախարարությունում: Անհանգստացած են թե՛ պետական մարմինները և թե՛ մասնագետները: Մտահոգիչն այն է, որ խնդրի լուծումը դեռ չկա, այս պահին հույսը միայն եղանակային պայմանների «բարեհոգության» վրա է:

Դեռ տարիներ առաջ էին մասնագետներն ահազանգում, երբ փակվեց Գետառի հունը: Նրանք մեջբերում էին 1946 թվականին Երևանում տեղի ունեցած սարսափելի սելավը՝ Գետառի վարարման հետևանքով:

Իսկապես, ժամանակին Գետառն ուժեղ սելավների պատճառ է դարձել, որոնցից ամենահզորն ու աղետալին եղել է 1946 թվականին, երբ վնասվել էր Երևանի հյուսիսային, հյուսիս-արեւելյան մասը: Մասնագետների պատմելով՝ Գետառով այդ ժամանակ անցել է վայրկյանում 200 խորանարդ մետր ջրաքանակ՝ խառնված ավազաքարերի հետ։ Ականատեսների պատմելով՝ սելավը Կենդանաբանական այգու մոտ մի ժայռաբեկոր էր բերել, որն ամենամեծն էր՝ 120 տոննա քաշով։

Այսօր կրկին նույն խնդրի առջև ենք կանգնել, այս անգամ իրավիճակն առավել անկանխատեսելի է և լի աղետալի հետևանքներով՝ այն իմաստով, որ Գետառի զգալի հատվածը ծածկված է բետոնի շերտով: Թե ինչ լուծում կգտնեն պատկան մարմինները աղետը կանխելու համար, հայտնի չէ: Փաստն այն է, որ ժամանակի առումով հնարավորությունները խիստ սահմանափակ են:

Հասմիկ Գրիգորյան

Հ. Գ. Գետառի 1946 թվականի աղետի լուսանկարները վերցված են Հովիկ Չարխչյանի բլոգից: Իսկ գունավոր լուսանկարներում մերօրյա Երևանն է երկու տարի առաջ՝ սովորական անձրևներից հետո՝ Ֆոտոլուրի աչքով: Թե ինչ կարող է լինել այսօր՝ արտակարգ տեղումներից հետո եղանակի կտրուկ տաքացման հետևանքով, մտածեք ինքներդ: