Սառույցը կոտրվում է. Եվրոխորհրդարանը կարող է ճանաչե՞լ Կատալոնիայի անկախության հանրաքվեն

Հոկտեմբերի 1-ին Կատալոնիայում անցկացված հանրաքվեի ժամանակ Իսպանիայի ոստիկանական ուժերի գործողությունները իսկական շոկ են առաջացրել Բրյուսելում, ու չնայած ոստիկանական ուժերի բիրտ գործողություններին, Կատալոնիայում հանրաքվեին մասնակցել է ավելի քան 2 մլն 300 հաար մարդ, որից 90 տոկոսը կողմ է արտահայտվել Կատալոնիայի անկախությանը:

Ըստ փորձագետների, եթե ընդամենը մեկ ամիս առաջ կատալոնցիները այս հարցում տրոհված էին, ապա այս մեկ ամսվա ընթացքում Մադրիդի կոշտ արձագանքման արդյունքում կատալոնցիների տրամադրությունները փոխվեցին: Գագաթնակետը եղավ հենց հանրաքվեի օրը, հոկտեմբերի 1-ին: Արդյունքում անկախության կողմնակիցների թիվը, ըստ փորձագետների, աճեց ավելի քան 80 տոկոսով: Եվ եթե սկզբնական փուլում Բրյուսելը միաժամանակ աջակցում էր Մադրիդին, ապա վերջին փուլում Եվրոմիության կենտրոնական կառույցների կողմից հակասական ազդակներ էին հնչում: Իսկ հանրաքվեի օրը, երբ Մադրիդը ցույց տվեց իր բիրտ ուժը, "սառույցը կոտրվեց", և առաջին արձագանքն ի պաշտպանություն կատալոնցիների հնչեց նաև Բրյուսելից, մասնավորապես Եվրոխորհրդարանի փոխնախագահ Ուլրիկե Լունաչեկը հայտարարեց, որ Կատալոնիայի հանրաքվեն օրինական բնույթ ունի, և ինքը հիասթափված է իսպանական իշխանությունների գործողություններից` կոչ անելով անհապաղ երկխոսություն սկսել Բարսելոնայի և Մադրիդի միջև:

Ըստ էության, կարելի է ասել, որ Մադրիդի գործողությունները հակառակ էֆեկտ ունեցան, և դժվար կացության մեջ դրեցին Եվրոմիության կենտրոնական կառույցներին, որոնք սկզբնական փուլում աջակցում էին Մադրիդին:

Իսպանական իշխանությունները օրինակ չվերցրեցին Մեծ Բրիտանիայի իշխանություններից, որոնք անցյալ տարի ճնշումներ չիրականացրեցին շոտլանդացիների հանդեպ, և արդյունքում Շոտլանդիայում անցկացված հանրաքվեի ժամանակ շոտլանդացիների մեծամասնությունը մերժեցին անկախությունը, և Բրիտանիան քաղաքակիրթ ճանապարհով կարողացավ պահպանել Շոտլանդիան` իր կազմի մեջ, մինչդեռ իսպանացիները անգլիացիների այդ խոհեմությունը չցուցաբերեցին, և արդյունքը կարող է լինել ճակատագրական Իսպանիայի համար, հաշվի առնելով այն, որ եթե կատալոնցիներին հաջողվի անկախանալ Իսպանիայից, ապա շղթայական ռեակցիայի արդյունքում իրենց ինքնորոշման մասին կհայտարարեն մյուս իսպանական ավտոնոմիաները` Վալենսիան, Անդալուզիան, Բասկերի երկիրը և այլն:

Հակոբ Կարապետյան