Սերժ Սարգսյանին պարտադրում են զիջումնե՞ր անել ղարաբաղյան հարցում
Ինչպես հայտնի է, սեպտեմբերի 24-ին Նյու- Յորքում կայացավ Հայաստանի և Ադրբեջանի արտգործնախարարների հանդիպումը, որի նպատակը բանակցային գործընթացի ակտիվացմանն ուղղված ճանապարհների որոնումն էր: Բացի այդ, քննարկվել է նաև մոտ ապագայում Հայաստանի և Ադրբեջանի նախագահների նոր հանդիպման մասին:
Այս հանդիպումից հետո ԵԱՀԿ Մինսկի խմբի համանախագահները հանդես եկան համատեղ հայտարարությամբ, որտեղ հույս հայտնեցին, որ նախագահների առաջիկա բարձր մակարդակների հանդիպումը կնպաստի կողմերի միջև փոխվստահության ամրապնդմանը, ինչպես նաև նրանց մոտ քաղաքական կամքի դրսևորմանը` գտնելու փոխզիջումային որոշում` հակամարտության առանցքային խնդիրների շուրջ: Հետաքրքիր է, որ այդ հանդիպումից և համանախագահների հայտարարությունից հետո Ադրբեջանի ԱԳՆ-ն բավականին ոգեշնչված հայտարարությունով հանդես եկավ: Մամեդյարովը հայտարարեց, որ միջնորդների կողմից որոշ առաջարկների միանշանակ աջակցում է Ադրբեջանը:
Ուշադրություն դարձնենք այն հանգամանքի վրա, որ Ադրբեջանի ԱԳՆ-ն ոգևորված է, իսկ Հայաստանի ԱԳՆ-ն լռում է: Հետաքրքիր է այս ֆոնին Ռուսաստանի պետդումայի հանձնաժողովներից մեկի նախագահի հայտարարությունն այն մասին, որ այս վերջին հանդիպումը կարող է ռեալ ճանապարհ բացել Լեռնային Ղարաբաղի խնդրի առաջխաղացման համար: Հայաստանյան շրջանակներն այս առիթով արձագանք չտվեցին: Ճիշտ է, Շարմազանովը հայտարարում է, որ Հայաստանի համար առաջնայինը Լեռնային Ղարաբաղի կարգավիճակի խնդիրն է, բայց բոլորը հիշում են Նալբանդյանի վերջերս արած հայտարարությունը` տարածքների վերադարձի մասին, որն անկասկած պատահականորեն չէր հնչեցված: Տպավորությունն այնպիսին է, որ միջնորդներն ունեն արդեն միասնական կոնսոլիդացված լուծումներ` Ղարաբաղի հարցում և սպասում են, որ Հայաստանի նախագահը իր վերջնական և հստակ դիրքորոշումը հայտնի այս հարցում: Եվ այդ լուծումները ամենևին էլ շահավետ չեն հայկական կողմի համար:
Հակոբ Կարապետյան
Հետևեք մեզ Facebook-ում