Արցախից Երեւան տեղափոխված հիվանդի առողջական վիճակը կայուն է

Ստեփանակերտի «Հանրապետական բժշկական կենտրոնից» երեկ՝ դեկտեմբերի 19–ին, Կարմիր Խաչի ուղեկցությամբ Հայաստան տեղափոխած հիվանդը հոսպիտալացվել է «Նորք–Մարաշ» բժշկական կենտրոնում։ Երեւանի քաղաքապետարանի լրատվության վարչության պետ Լեւոն Սարդարյանը NEWS.am-ի հետ զրույցում ասաց, որ հիվանդի առողջական վիճակը կայուն է՝ չփոխանցելով այլ մանրամասներ:

Հիշեցնենք, որ 62–ամյա տղամարդը սրտի հրատապ վիրահատության կարիք ուներ։ Նա պետք է դեռ անցած շաբաթվա սկզբին տեղափոխվեր Երեւան, բայց Արցախը Հայաստանին կապող միակ ճանապարհի փակման հետեւանքով, դա անհնարին էր դարձել։ Արցախի Առողջապահության նախարարության առավոտյան հայտնած տվյալով, «Արեւիկ» բուժմիավորումում 13 երեխա գտնվում է վերակենդանացման եւ նորածնային բաժանմունքներում:

Նրանցից 4 ամսական փոքրիկի առողջական վիճակը, ում մոտ ախտորոշվել էր «Վիսցերալ լեյշմանիոզ», շարունակում է մնալ ծանր: Արցախի բժիշկները անհրաժեշտ բուժօգնությունը ցուցաբերում են՝ առցանց կապով խորհրդակցելով ՀՀ մասնագետների հետ: Իսկ «Հանրապետական բժշկական կենտրոն»-ում 9 հոգի գտնվում է ռեանիմացիոն բաժանմունքում, որից 2-ը ծայրահեղ ծանր վիճակում են, բժիշկների կողմից կատարվում է հնարավորը հիվանդների վիճակը կայունացնելու համար: