Ղարաբաղցիները կասկածում են, որ Սերժ Սարգսյանն իրենց թիկունքում տարածքները վերադարձնելու պլա՞ն է մշակում

Հայաստան - Սփյուռք համաժողովի ժամանակ շատերը նկատեցին, որ Էդվարդ Նալբանդյանը գրեթե սենսացիոն հայտարարությունով հանդես եկավ`  առաջին անգամ նշելով, որ բանակցություններ են վարվում Ադրբեջանի հետ` երեք շրջաններ վերադարձնելու մասին: Ընդ որում, այդ շրջանների դիմաց չի դրվում կարգավիճակի ճանաչման հարցը, քանզի եթե դա լիներ, ապա Նալբանդյանն անպայման այդ մասին կավետեր: Ավելին, Ղարաբաղի ճանաճման վերաբերյալ նալբանդյանը հատուկ նշեց, որ էմոցիոնալ որոշումներով չպետք է շարժվել, իսկ Հայաստանը կճանաչի Ղարաբաղը այն դեպքում, երբ Ադրբեջանը սկսի լայնածավալ պատերազմ: Այստեղ է, որ հռետորական հարցադրում է առաջ գալիս. եթե Հայաստանը բանակցում է երեք տարածքները վերադարձնելու շուրջ, ապա ինչո՞ւ Ադրբեջանը պետք է սկսի պատերազմ: Եվ ուրեմն, ստացվում է, որ Լեռնային Ղարաբաղի կարգավիճակի խնդիրը, փաստացի, օրակարգից դուրս է եկել:

Հետաքրքիր է, որ նույն համաժողովում Լեռնային Ղարաբաղի արտգործնախարար Կարեն Միրզոյանը բոլորովին այլ շեշտադրումներով հանդես եկավ, որը համահունչ չէր Նալբանդյանի ելույթին: Ավելին, համաժողովի կուլիսներում երբ Կարեն Միրզոյանին հարցրեցին, թե կա՞ արդյոք հակասություն Հայաստանի և Ղարաբաղի միջև բանակցային գործընթացի վերաբերյալ, նա այդ հարցը անպատասխան թողեց, փոխարենը շեշտեց, որ եթե Լեռնային Ղարաբաղը բանակցային գործընթացին չի մասնակցում, ապա 90 տոկոսով այդ խնդիրը չի լուծում: Իսկ Լեռնային Ղարաբաղի Մարդու իրավունքների պաշտպանը արդեն մեջբերեց Լապշինին` ակնարկելով, որ այդ երկրի հետ լուրջ երկխոսությունը բավականին պրոբլեմատիկ խնդիր է:

Անշուշտ, արտաքուստ Լեռնային Ղարաբաղի իշխանություններն ունեն շատ ջերմ հարաբերություններ Սերժ Սարգսյանի հետ, սակայն այս դրվագները հուշում են, որ նրանց մոտ կա խոր անվստահություն` Երևանի դիրքորոշումների վերաբերյալ, բանակցային գործընթացի շուրջ:

Արտակ Հակոբյան