Վարկերը արդյունավետ կառավարեք, թքած ունեմ՝ քանի աթոռ եք գնել, կարևոր է՝ աթոռներն ինչին են ծառայում

Բյուջետային աջակցության ծրագրի ներքո վարկ վերցնելը նշանակում է, որ զարգացման գործակալությունը կամ ֆինանսական կազմակերպությունը տալիս է արտոնյալ պայմաններով փող և դրան զուգահեռ՝ «տնային աշխատանք»։ Այս մասին 24News-ին ասաց տնտեսագիտության թեկնածու, ՀՀ ֆինանսների նախկին նախարար Վարդան Արամյանը։

Կառավարությունն այսօր նիստի ժամանակ դրական եզրակացություն տվեց «Հայաստանի Հանրապետության կառավարության և Զարգացման ֆրանսիական գործակալության միջև թիվ CAM 1016 01 վարկային համաձայնագրին» հավանություն տալու վերաբերյալ նախագծին:

Ըստ նախագծի՝ համաձայնագրի ստորագրումը ենթադրում է վարկի տեսքով բյուջետային աջակցության ծրագրի ներքո 100 մլն եվրո միջոցների ստացում: Ըստ նախագծի՝ ծրագրի շրջանակը մասնավորապես ներառում է՝

1.հարկաբյուջետային պլանավորման, թափանցիկության, ռիսկերի կառավարման, ինչպես նաև՝ պետական ծախսերի արդյունավետության բարձրացումը, 2. պետական ներդրումների, այդ թվում՝ պետություն-մասնավոր գործընկերության համակարգի բարեփոխումները, 3.պետական գնումների համակարգի արդիականացումը, 4.կանաչ տնտեսության քաղաքականության մշակումը, կլիմայի փոփոխության հարմարվողականության բարձրացումն ու կանաչ ֆինանսական գործիքների կիրառության ընդլայնումը, 5.կառավարության պարտքի կառավարման համակարգի բարելավումը, 6.ֆինանսական և կապիտալի շուկաների զարգացումը, 7.կորպորատիվ թափանցիկության ընդլայնումը հաշվապահական հաշվառման և առուդիորական գործունեության կարգավորման իրավական շրջանակի վերանայմամբ: ՀՀ ֆինանսների նախկին նախարար Վարդան Արամյանի խոսքերով՝ այս տեսակի վարկը տրվում է որպես բյուջեի ֆինանսավորման աղբյուր, իսկ «տնային աշխատանքը» զարգացման կոմպոնենտը, այսինքն՝ ասում են՝ «տվյալ ուղղություններով փոփոխություններ անես, որպեսզի կարողանաս համապատասխանել այդ վարկի ստացման պահանջներին»։ «Այսպիսի վարկը վատ գործիք չէ, որովհետև եթե պետությունն այս գումարը չվերցնի որպես դեֆիցիտի ֆինանսավորման աղբյուր, պետք է՝ ա) ներքին պարտք թողարկի, բ) կապիտալի շուկայում պարտք թողարկի։ Այսպիսի վարկն ավելի արտոնյալ է, ճիշտ է արտարժույթային է, բայց օրինակ՝ 100 միլիոնը կապիտալի շուկայից եթե վերցնես, ավելի բարձր տոկոսադրույքներ են լինելու։ Երկրորդ առավելությունն այն է, որ տրվում է տնային աշխատանք։ Քեզ այդ ֆինանսական գործով ստիպում են ավելի ագրեսիվ ռեֆորմներ իրականացնել։ Վարկ վերցնելը վատ բան չէ, այլ բան է, թե որքան է ծավալը, ինչպես ես կառավարում», - ընդգծեց տնտեսագետը։

«Վերջին տարիների գերակայություններում ուրիշ պրոբլեմ կա։ Չեմ կարողանում հասկանալ պրեմիալ ֆոնդի, գործուղումների, թեկուզ կապիտալ ծախսերը։ Այսպես չի կարելի, պետք է գերակայությունները վերանայվեն։ Օր․՝ ծախս ես կատարում, ճանապարհ ես նորոգում, և այդ ճանապարհով նախկինում 100 մեքենա էր անցում, հիմա՝ 5, որովհետև դու պաշտպանական խնդիրները չես լուծել, որ հարավային տարածքներում դիրքերը կահավորես։ Թուրքերի կողմից դիտարկվում է այդ ճանապարհը, մարդիկ վտանգ են տեսնում անցնելիս, դա արդեն անարդյունավետ ծախս է։ Նշանակում է՝ կատարել եմ կապիտալ ծախսը, բայց այն չի տվել ցանկալի արդյունքը։ Նպատակն էր, որ 100 մեքենան դառնար 200, բայց անցնում է 5 մեքենա»,-պարզաբանեց Արամյանը։

Վարդան Արամյանը նաև ցուցանիշներ նշեց․ «Ոստիկանական համակարգի վրա ծախսերն ավելանում են վերջին տարիներին։ Որպես հարկատու՝ նայում եմ, թե իմ փողն ինչպես է ծախսվում։ Երբ որ տեսնում եմ, որ համակարգի մեծացմանը զուգահեռ աճում է հանցագործությունների, ճանապարհատրանսպորտային պատահարների թիվը, ուրեմն անարդյունավետ, բուտաֆորիկ ծախս է։ Իմ՝ որպես հարկատուի ամենակարևոր խնդիրը չեն լուծում։

Հունվար-սպետեմբերով ՃՏՊ-ի թիվը 70%-ից ավելի է աճել, մահացությունների թիվը 71%-ից ավելի է աճել»։ «Երբ որ պարտք ենք վերցնում, եթե համընդհանուր ծախսերից ենք խոսում, երկու թիրախ կա՝ 1․ ծախսերի գերակայություն․ ո՞րն է ավելի առաջնահերթ և 2․ ծախսերը արդյունավետությունը, այսինքն՝ մեր ճյուղային ծախսերը սկզբնական, միջանկյալ և վերջնական ի՞նչ արդյունքներ են ունենում։ Ես թքած ունեմ, թե քանի աթոռ եք առնում, ինձ համար կարևոր է, թե այդ աթոռներն ինչի են ծառայում», - եզրափակեց Արամյանը։

Աղբյուր՝ 24News.am