Վաշինգտոնը Սահակաշվիլի - Պորոշենկո վեճում անցավ Սահակաշվիլիի կողմը

Միացյալ Նահանգների պետդեպի Ուկրաինայի գծով հատուկ ներկայացուցիչ Կուրտ Վոլկերը Սահակաշվիլի - Պորոշենկո վեճի առիթով անսպասելի հայտարարությամբ հանդես եկավ: 

"Եթե Ուկրաինան ուզում է դառնալ իրավական պետություն, ապա Սահակաշվիլիին պետք է թույլ տալ, որ ինքը իր քաղաքացիության խնդիրը վիճարկի դատարանում, իսկ Պորոշենկոյին անհրաժեշտ է, որ նա իր ուշադրության կենտրոնից թողնի Սահակաշվիլիին և զբաղվի ավելի կարևոր գործերով, մասնավորապես բարելավի երկրի կառավարումը և զբաղվի կոռուպցիայի դեմ պայքարով":

Ըստ էության, Վոլկերի այս հայտարարությունը կարող է հիմնովին փոխել քաղաքական ուժային բալանսը Ուկրաինայում` ի վնաս Պորոշենկոյի, քանզի պոստխորհրդային այս երկրում, երբ մարդիկ տեսնեն, որ իշխանության ուժը չի պատում Սահակաշվիլիի վրա, ապա այդ իշխանությունը սրընթաց կկորցնի իր լեգիտիմությունը հասարակական բոլոր շերտերի մոտ, այդ թվում նաև պետական կառավարման համակարգում, որտեղ պարզ կերևա, որ "պապան"` Միացյալ Նահանգները, այս վեճում ավելի դրական է տրամադրված Սահակաշվիլու, քան թե` Պորոշենկոյի հանդեպ:

Սակայն Սահակաշվիլին ունի մեկ այլ պրոբլեմ: Բանն այն է, որ իրեն անհրաժեշտ է արագ իշխանափոխություն, քանզի տվյալ պահին ժամանակն աշխատում է Պորոշենկոյի օգտին: Սակայն իշխանափոխության լավագույն պատրվակը ընտրություններն են, կապ չունի` խորհրդարանական, թե նախագահական: Սակայն մոտակա մեկ ու կես տարվա ընթացքում նման բան չի նախատեսվում այդ երկրում: 

Հիշեցնենք, որ մի անգամ Սահակաշվիլին կարողացել է նույն մեթոդով իշխանության գալ Վրաստանում` 2003 թվականին, և այսօր նա փորձելու է նույն բանը կրկնել Ուկրաինայում:

Կհաջողվի՞ դա նրան, ցույց կտա ժամանակը:

Հակոբ Կարապետյան