Առանց ադրբեջանական կողմի ներկայացուցչի Դավիթ Բաբայանից հարցազրույց վերցնելու համար Վլադիմիր Սոլովյովը ներողություն է խնդրել Բաքվից. Տեսանյութ

Ռուսաստանցի հայտնի լրագրող և հաղորդավար Վլադիմիր Սոլովյովը ներողություն է խնդրել ադրբեջանական կողմից այն բանի համար, որ առանց ադրբեջանական կողմի ներկայացուցչի Արցախի ԱԳՆ ղեկավար Դավիթ Բաբայանից հարցազրույց է վերցրել: 

«Ես քաղաքական մեծ սխալ թույլ տվեցի, քանի որ խախտեցի ուժերի հավասարակշռությունը մի շատ բարդ համակարգում, որն այժմ տեղի է ունենում Կովկասում: Եվ, իհարկե, եթե ես եթեր եմ տալիս Ղարաբաղի ներկայացուցչին, ապա անհապաղ պետք է եթեր տամ Ադրբեջանի ներկայացուցչին՝ հավասարակշռություն պահպանելու և դա ճիշտ անելու համար։ Ես պարզապես փորձում էի դա անել հերթով: Չստացվեց ու պետք էր հարցը համաձայնեցնել թե՛ մեկի, թե՛ մյուս կողմի հետ, որպեսզի լրագրողական անաչառություն լինի։ Այսպիսով, հիմա բավականին դժվար է: Մտածում եմ, ինչպես կարելի է մեկնաբանություն ստանալ մեծարգո ադրբեջանական կողմից։ Ցավոք, դա հեշտ չէ... 

Ես ժամանակին պատիվ եմ ունեցել զրուցելու Ադրբեջանի նախագահի հետ, 44-օրյա պատերազմից հետո նման զրույցներ չեն եղել։ Եվս մեկ անգամ կրկնում եմ՝ ես պատրաստ եմ ցանկացած մակարդակի եթեր տրամադրել ադրբեջանական կողմին արտահայտվելու համար, և, իհարկե, առաջին հերթին գնահատում եմ այս տարածաշրջանում խաղաղությունն ու անդորրը։ Ուստի ներողություն եմ խնդրում այս թեման դաշնային եթերում լուսաբանելիս անաչառության կանոնները չպահպանելու, երկու կողմերի դիրքորոշումը միաժամանակ արտահայտելու հնարավորություն չտալու համար, ինչպես արեցինք 44-օրյա պատերազմի ժամանակ։ Աշխարհում ամենաքիչը կցանկանայի խնդիրներ ստեղծել այս ուղղությամբ...», - ասաց Սոլովյովը:

Մանրամասները՝ կից տեսանյութում: 

Խմբ. Ընդամենը 2-2,5 տարի առաջ անհնար էր պատկերացնել, որ ավանդաբար հայամետ հայացքներ ունեցող Վլադիմիր Սոլովյովին կստիպեն, ելնելով ուժերի առկա հարաբերակցությունից, ներողություն խնդրել Ադրբեջանից՝ Լեռնային Ղարաբաղի նախարարի հետ հարցազրույց վերցնելու համար։

Այդ թվում՝ նման դրսևորումները վկայում են, որ 2020 թվականի սեպտեմբերի 27-ից Արցախում սկսվել է ոչ միայն տարածքներ կորցնելու, այլև Արցախի պետականության կործանման գործընթաց, ու սրա մետաստազները հայտնվում են անգամ Մոսկվայում։

Ընդհանուր առմամբ, Ռուսաստանի Դաշնությունում հայկական լոբբին 2020 թվականի կապիտուլյացիոն ակտից հետո կտրուկ կորցրել է իր քաղաքական կշիռը։ Ռուսաստանի Դաշնությունում այդ ազդեցության վերականգնումը նույնպես պետք է լինի Հայաստանի ցանկացած նոր իշխանության առաջնահերթություններից, և այսօր այն պետք է լինի ընդդիմության ուշադրության կենտրոնում։

Zham.am