Ինչու՞ է Բլինկենի զանգը Ալիևին հունից հանել Պուտինին

Ինչպես հայտնի է, օրեր առաջ ԱՄՆ պետքարտուղար Էնթոնի Բլինկենը հեռախոսազրույց է ունեցել Հայաստանի և Ադրբեջանի ղեկավարների հետ, որի հիմնական նպատակը՝ հեռու պահել երկու երկրներին Ռուսաստանի գործողություններից Ուկրաինայում: Ամերիկացիներն լավ են հասկանում, որ թե Հայաստանը, և թե Ադրբեջանը խորապես կախված են Մոսկվայից, մանավանդ որ վերջինիս խաղաղապահ ուժերն են տեղակայված Արցախում: Այնուամենայնիվ, Վաշինգտոնի համար կարևոր է, որպեսզի Հայաստանն ու Ադրբեջանը հնարավորինս հեռու մնան Մոսկվայի գործողություններից Ուկրաինայում: Նիկոլ Փաշինյանի հետ զրույցում Բլինկենը կարևորել էր «...Հայաստանում ժողովրդավարության գործընթացների հետագա շարունակականությունը...» առանց մատնանշելու, թե ինչ են խոսել ուկրաինական ճգնաժամի շուրջ: Ալիևի հետ զրույցում Բլինկենը «...շնորհակալություն էր հայտնել...» Ադրբեջանի ղեկավարին «Ուկրաինային աջակցելու համար»:

Բաքուն, իհարկե, հրապարակավ Կիևին աջակցություն չի ցուցաբերել, իսկ ՄԱԿ-ում նույնիսկ Ռուսաստանին դեմ չի քվեարկել, որպեսզի չզայրացնի Մոսկվային: Սակայն իր ոչ պաշտոնական քայլերը հուշում են, որ Բլինկենը ճիշտ էր շնորհակալություն հայտնում Ալիևին:

Բանն այն է, որ Վաշինգտոնը մտադիր է Եվրոպային մատակարարվող ռուսական էներգակիրներին փոխարինող գտնել: Այդ կապակցությամբ նա նույնիսկ սկսել է բանակցել Վենեսուելայի և Իրանի հետ: Իսկ, ահա, Ադրբեջանը հեշտությամբ համաձայնվել է ավելացնել Եվրոպային մատակարարող գազը, տարեկան մոտ 30 միլիարդով ավել: Հասկանալի է, որ դա մատակարարվող ռուսական գազի նույնիսկ 10 տոկոսն էլ չի կազմում: Սակայն այստեղ կարևոր է ոչ թե քանակը, այլ պատրաստակամությունը: Օրինակ, իրանցիներն ու Վենեսուելայի ղեկավարը, ըստ հավաստի աղբյուրների, մերժել էին ամերիկացիների առաջարկը:

Մինջդեռ Ադրբեջանը, որ ավելի խորն է կախված Մոսկվայից, հեշտությամբ համաձայնվում է ամերիկացիների առաջարկների հետ: Ավելին, Ալիևը ոչ միայն «մոռացել է» վերջերս կնքած Մոսկվայի հետ դաշնակցային համաձայնագիրը, այլև իր լրատավամիջոցների միջոցով բացահայտորեն անցել է Ուկրաինայի կողմը: Այսօր, ադրբեջանական քարոզչամեքենան, գրեթե 90 տոկոսով սպասարկում է Կիևի շահերն ընդդեմ Մոսկվայի: Վերջինիս արձագանքն էլ չուշացավ, մարտի 16-ից Ռուսաստանում այլևս ադրբեջանական հիմնական կայքերը արգելափակվել են, ինչը նշանակում է մեկ բան՝ ՌԴ նախագահ Վլադիմիր Պուտինը Ադրբեջանի նախագահ Իլհամ Ալիևի գործողությունը գնահատել է որպես «մեջքից դաշույնով հարված»:

Ճիշտ է դրա մասին դեռ հրապարակայնորեն չի ասվում, սակայն ենթադրելի է, որ մոտ ժամանակներս կամ Ադրբեջանի պահվածքը կփոփոխվի, կամ էլ Կլեմլի դժգոհությունը կհրապարակայնացվի:

Սա է իրականությունը:

Արտակ Հակոբյան