Կարո՞ղ է Ուկրաինան Սահակաշվիլուն արտահանձնել Վրաստանին

Այսօր Ուկրաինայի նախագահ Պյոտոր Պորոշենկոն պաշտոնական այցով կմեկնի Վրաստան, որտեղ նախատեսված են նրա հանդիպումները այդ երկրի նախագահի և վարչապետի հետ:
Պորոշենկոյի այցը Վրաստան հետաքրքրական է նրանով, որ սկսած 2014թ. կեսերից Պորոշենկոյի հարաբերությունները ներկայիս Վրաստանի իշխանությունների հետ խիստ վատթարացել էին` կապված այն հանգամանքից, որ Պորոշենկոն ոչ միայն ապաստան էր տվել այսօրվա Վրաստանի իշխանությունների թշնամուն` Սահակաշվիլուն, այլև նրան նշանակել էր Օդեսայի նահանգապետ և թույլ էր տվել, որ սկսի ակտիվ զբաղվել քաղաքականությամբ` շնորհելով նրան Ուկրաինայի քաղաքացու կոչում:

Պորոշենկոն հույս ուներ Սահակաշվիլու միջոցով պայքարել իր հիմնական մրցակիցների դեմ` Կոլոմոյսկու կլանի, նախկին վարչապետ Յացենյուկի և այլն, սակայն Սահակաշվիլին իր պայքարում անցավ իրեն թույլատրված կարմիր գիծը և սկսեց պայքարել իշխանության բուրգում գտնվող բոլոր կլանների դեմ, այդ թվում նաև Պորոշենկոյի, ինչը վերջինիս դուր չեկավ: Արդյունքում Պորոշենկոն ազատեց Սահակաշվիլուն Օդեսայի նահանգապետի պաշտոնից` միաժամանակ իշխանության համակարգից հանելով Սահակաշվիլու բոլոր կողմնակիցներին: Վերջինիս ոչինչ չէր մնում, քան նոր քաղաքական ուժ ստեղծել և սկսել պայքարել անձամբ Պորոշենկոյի իշխանության դեմ:

Շատ վերլուծաբանների կարծիքով Սահակաշվիլին կարող է մեծ հաջողություն ունենալ, եթե նա կարողանա միավորվել Յուլյա Տիմոշենկոյի հետ: Զգալով այդ վտանգները` Պորոշենկոն փորձում է Սահակաշվիլուն հարվածել թիկունքից: Հենց դրանով է պայմանավորված նրա այցը Վրաստան: Ուղղակի Սահակաշվիլուն նա չի կարող հանձնել վրացիներին, քանի որ դրա համար նրան պետք է զրկի Ուկրաինայի քաղաքացիությունից, սակայն դրա համար Պորոշենկոն ոչ մի իրավական հիմք չունի: Գիտակցելով դա, Պորոշենկոն փորձում է բարոյական ճնշում գործադրել Սահայկաշվիլու վրա` ներկայիս վրացական իշխանության միջոցով, որի հետ հարաբերությունները «սառեցվել էին» հենց Սահակաշվիլու պատճառով:

Հակոբ Կարապետյան