Ինչու՞ է ռուսական նավատորմը զորավարժություններ անցկացնում Կասպից ծովում

Կասպից ծովում ներկայումս սկսված զորավարժություններին մասնակցում են  Կասպից նավատորմի մոտ 20 ռազմանավ, հաղորդում է ՌԴ ՊՆ Հարավային ռազմական շրջանի մամուլի ծառայությունը:

Խոսքը «Դաղստան» հրթիռային նավի, «Գրադ Սվիյաժսկ», «Ուգլիչ», «Վելիկի Ուստյուգ», «Մախաչկալա», «Աստրախան», «Ստուպինեց», փոքր հրետանային նավերի, բազայի ականակիրների, նավակների, ինչպես նաև նավերի անվտանգության մասին է: Նավատորմի նավերի անձնակազմերը համատեղ գործողություններ են մշակելու մեկ մարտական ​​կարգով նավարկելու, կեղծ թշնամու օդային հարձակման միջոցները հետ մղելու և ծովային կեղծ մարտեր վարելու համար: Հետաքրքիր է, որ զորավարժությունների անցկացման վերաբերյալ մամլո հաղորդակցության մեջ հատուկ նշված են մի քանի շեշտադրումներ, որոնք արժե մեկնաբանել: 

Առաջին

Զորավարժությունների հիմնական նպատակն է մշակել ռազմածովային և օդատիեզերական ուժերի գործողությունները Համաշխարհային օվկիանոսում:

Ռուսաստանի ազգային շահերը պաշտպանելու, ինչպես նաև ծովային և օվկիանոսային ուղղություններից Ռուսաստանի Դաշնությանը սպառնացող ռազմական սպառնալիքներին հակազդելու համար:

Սա հռչակված ընդանուր նպատակն է, որտեղ փաստացի նշվում են այն կետերը, որտեղ առկա են Ռուսաստանին սպառնացող վտանգները: Այսինքն, Մոսկվան համարում է, որ հենց այս կետից նույնպես նա պոտենցիալ սպառնալիք է զգում իր շահերի համար: Ուշադրությամբ դիտարկելով այս տարածաշրջանը, դժվար չէ հասկանալ, թե որ երկրից կարող է լինել այդ սպառնալիքը:

Երկրորդ

Տեղեկատվության մեջ Կասպից ծովում զորավարժությունները կապվում է նաև Միջերկրական ծովում այս պահին ընթացող զորավարժությունների հետ: Ընդ որում,  եթե Միջերկրականում մասնակցում են 15 նավ, ապա Կասպից ծովում նավերի քանակը հասնում է 20-ի:

Եթե հաշվի առնենք, որ Ռուսաստանի կասպիական նավատորմը բաղկացած է ընդամենը  30 նավից, իսկ ներկայիս զորավարժություններին մասնակցում են 20-ը, դա նշանակում է, որ Մոսկվան այս տարածքում նպատակ ունի ուժային «մկան» ցույց տալ: Ու՞մ կարող է հասցեագրվել այդ մեսիջը, նույնպես դժվար չէ կռահել, հաշվի առնելով, որ ՆԱՏՕ-ից սպառնալիք Մոսկվան այս տարածաշրջանից  չունի, ոչ Իրանից, ոչ Թուրքմենստանից, ոչ էլ Ղազախստանից:

Երրորդ

Հիշեցնենք, որ ավելի վաղ Ռուսաստանը Ազովի և Սև ծովերի հսկայական տարածքները հայտարարել էր վտանգավոր և փակ նավարկության համար՝ փետրվարի 13-ից 19-ն ընկած ժամանակահատվածում, իբր զորավարժությունների հետ կապված:

Այսինքն, փետրվարի 19-ին այս տարածքում Ռուսաստանը բացում է շրջափակումը, իսկ փետրվարի 17-ին Կասպից ծովում նոր զորավարժություններ է անցկացնում: Եթե հաշվի առնենք, որ ներկա դրությամբ ռուսական ռազմածովային ուժերն աշխարհի տարբեր մասերում զորավարժություններ են անցկացնում, որին մասնակցում են թվով 140 նավ և 10 000 ռազմական նավաստի, ապա կարող ենք ենթադրել, որ այս քայլով Ռուսաստանը որոշել է իր ուժային «մկանները» ցույց տալ ողջ աշխարհին, կարծես ակնարկելով, որ իր շահերը նա պաշտպանելու է ցանկացած գնով:

Չորրոդ

Հաղորդագրությունում հատուկ նշված է, որ «...Նավերի անձնակազմերը համատեղ գործողություններ են մշակելու մեկ մարտական ​​կարգով նավարկելու,  թշնամու օդային հարձակման, այդ թվում նաև անօդաչու սարքերի   միջոցները հետ մղելու և ծովային կեղծ մարտեր վարելու համար...»:

Ռուսական հաղորդագրությունների մեջ վերջին ժամանակներում հատուկ փորձ է արվում ցույց տալ, որ ռուսական բանակը կարող է դիմակայել ցանկացած տիպի անօդաչու սարքերի գրոհին, այդ թվում նաև թուրքական Բայրաքթարների, քանի որ թուրքակական Բայրաքթարների կիրառումը 2020-ին Արցախում զգալի իմիջային վնաս էր հասցրել:

Եթե այս ամենին գումարենք այն, որ համաձայն ռուսական բանակի  գլխավոր  շտաբի զեկուցագրերի, ռուս-ուկրաինական բախման դեպքում կտրուկ մեծանալու էր Թուրքիայի ակտիվությունը Հարավային Կովկասի տարածաշրջանում, ապա չի բացառվում, որ այս Կասպյան ծովի զորավարժությունները յուրօրինակ մեսիջ են՝ ուղղված Անկարային և տարածաշրջանում իր սատելիտը դարձած Ադրբեջանին:

Սա է իրականությունը:

Արտակ Հակոբյան