Ու՞մ կարող է նշանակել Փաշինյանը ՀՀ նախագահի պաշտոնում. Էդմոն Մարուքյանը և Արամ Զավենիչը այդ ցանկում չեն կարող լինել

Երկու օր առաջ, իր վերջին հարցազրույցում Նիկոլ Փաշինյանը ակնարկեց, որ ՀՀ նախագահի պաշտոնում իրեն պետք է մի անձնավորություն, որ ավելորդ խաղեր չտա: Օրինակ, Արմեն Սարգսյանը ոչ միայն մի պահ միացավ Փաշինյանի հրաժարական պահանջողների շարքին, այլև հրաժարվեց ստորագրել Գլխավոր Շտաբի պետի պաշտոնանկության Փաշինյանի հրամանագիրը: Այդ իսկ պատճառով Փաշինյանն այդ պաշտոնում պետք է նշանակի մի այնպիսի անձնավորության, ով իր համար կծառայի «Հռոմի Պապից ավելի կաթոլիկ» լինելու սկզբունքով:

Այդ իսկ պատճառով այդ անձնավորությունը պիտի լինի ոչ միայն գրպանային, այլև իր գրպանի մեջ մի «կարած» գործիչ, ով այդ պաշտոնում կդառնա Փաշինյանի ստվերը:

Մամուլում քննարկում էին Էդմոն Մարուքյանի և Արամ Զավենիչի՝ Վազգեն Սարգսյանի եղբոր թեկնածությունները, որոնք չեն համապատասխանում Փաշինյանի այդ չափորոշիչներին:

Բանն այն է, որ Էդմոնը մի քանի անգամ խաղեր տվեց Փաշինյանի դեմ: Առաջինը հենց 2018-ի ապրիլին էր, երբ հրապարակավ մերժեց միանալ Փաշինյանին,  և դա այն դեպքում, երբ նույնիսկ ԲՀԿ-ն էր միացել այդ շարժմանը:

Հետագայում էլ Էդմոնը իր խաղերով մեկ անգամ չէր, որ նյարդայնացրել էր նրան, նույնիսկ դրա համար ստանալով «հայրական ապտակ» Սասուն Միքաելյանի կողմից:

Իսկ ինչ վերաբերվում է Արամ Զավենիչին, ապա նա կերազեր, որ Փաշինյանն իրեն համարեր իր գրպանի միջի գործիչը: Բայց այստեղ էլ կան մի քանի բայցեր: Նախ Արամ Զավենիչը գաղափարապես դավաճանեց իր սեփական եղբոր՝ Վազգեն Սարգսյանի հիշատակը, և 20 տարի քարոզում էր իր եղբոր հակառակ քաղաքական սկզբունքներն ու մոտեցումները: Բացի այդ իր այդ մոլուծքի մեջ նա դարձավ ընդգծված հակառուսական գործիչ, և նրան նշանակելով այդ պաշտոնում Փաշինյանը  լուրջ ձեռնոց կնետի Պուտինին: Եթե Ռուսաստանի դերը հետագայում թուլանա և մեծանա Թուրքիայի դերակատարումը, ապա չի բացառվում, որ այդ ժամանակ Արամ Զավենիչի պահանջվածությունը մեծանա: Թուրքիայում  գիտեն, որ Արամ Զավենիչը «իրենց մարդն է», և նույնիսկ Վազգենի արձանի վրա միզելը Շուշիում՝ չի փոխել Արամ Զավենիչի մոտեցումները, քանզի նրա շահերը վաղուց են շաղկապված Անկարայի հետ: Նույնիսկ Խաչատուր Սուքիասյանի հրապարակային քննադատությունը Վազգենի հասցեին քար լռության արժանացավ Արամ Զավենիչի կողմից: Ավելին, նա մտովի համաձայն էր Սուքիասյանի հետ, պարզապես կամաչեր դրա մասին հրապարակավ արտահայտվել: Չնայած  մի քանի անգամ նշել էր, որ Վազգեն Սարգսյանի մոտեցումների հետ շատ հարցերում նա ունեցել է տարաձայնություններ:

Թե ինչպես ստացվեց, որ իրեն Վազգենի «ժառանգորդ» համարող Արամ Զավենիչը կարող է ունենալ նրա հետ անհամաձայնություններ, այն էլ առանցքային հարցերում, միայն Դավալու գյուղում կարող են բացատրել: Քանի որ «ժառանգորդ» հասկացությունը, վերաբերվում է առաջին հերթին քաղաքական - գաղափարական ժառանգությանը:

Արամ Զավենիչին ժամանակին ամենալավը բնութագրել է Գագիկ Ջհանգիրյանը, նշելով, որ «եղբայր ծնվում են, իսկ ընկեր դառնում են»:

Նիկոլ Փաշինյանն այս ամենը չի կարող հաշվի չառնել, և այդ տեսանկյունից Արամ Զավենիչի թեկնածությունը նույնպես հարմար չի կարող լինել իր համար:

Այնպես որ ապագա ՀՀ նախագահի պաշտոնում մենք կտեսնենք մի հերթական «ուսապարկի», ով իրենից ոչինչ չի ներկայացնի և կդառնա Փաշինյանի «պատվավոր» ստվերը:

Սա է իրականությունը:

Դավիթ Մկրտչյան