Դադիվանքում 9 ամիս անց ուխտագնացությունները վերականգնված չեն

Դադիվանքում ուխտագնացությունները չեն վերականգնվել, բայց մեր եկեղեցականներն այնտեղ են։ Այս մասին NEWS.am-ի հետ զրույցում ասաց Արցախի թեմի առաջնորդ Տեր Վրթանես եպիսկոպոս Աբրահամյանը։

«Հինգ հոգեւորական ունեմ այնտեղ, որոնք իրենց ծառայությունն են մատուցում։ Երբ ուխտավորների մուտքն արգելված չէր, նրանք ամիսը մի անգամ այցելում էին Դադիվանք։ Դա հոգեւորականների, ուխտավորների համար հոգեւոր լիցքավորում ստանալու լավագույն միջոցներից է։ Ցավոք, այսօր այնտեղ միայն մեր  հոգեւորականներ են, որոնք իրենց սպասավորության մեջ են, կատարում են իրենց ժամերգությունները, պատարագները։ Այսպես ասած՝ աղոթական վիճակ է։ Նրանք աշխատում են իրենց գիտական աշխատանքների վրա, գրքեր, հոդվածներ են գրում, օգտակար աշխատանք են կատարում եւ շփվում խաղաղապահների հետ, մեզ հետ էլ՝ հեռախոսով, ոգեւորում ենք, զորակցություն հայտնում։ Սա է ընդհանուր մթնոլորտը»,– ասաց Սրբազան Հայրը։

Նշենք, որ հայ ուխտավորները մայիսից չեն կարողանում մտնել Դադիվանք։ Մինչ այդ նրանք խմբերով, ռուս խաղաղապահների ուղեկցությամբ այցելում էին Դադիվանք, բայց հետզհետե ադրբեջանցիները դժվարեցրեցին հայ ուխտավորների մուտքը Դադիվանք։ 2021թ.–ի հոկտեմբերին, Մոսկվայում, Ամենայն Հայոց Կաթողիկոս Գարեգին Բ–ն հանդիպել էր  Համայն Ռուսիո Կիրիլ Ա Պատրիարքի  եւ Ադրբեջանի հոգեւոր առաջնորդի հետ եւ բարձրաձայնել հայ հոգեւորականների ու հավատացյալների այցերը Դադիդավանք վերսկսելու հարցի շուրջ։ Ուխտագնացությունների վերականգնման շուրջ եռակողմ բանակցություններ էին ընթանում, սակայն այդ հանդիպումից երեք ամիս անց էլ հայ ուխտավորները չեն կարող այցելել Դադիվանք։