Ղազախստանում նախարար են նշանակել հայտնի պանթուրքիստի. Մոսկվան շոկի մեջ է

Ղազախստանի նախագահ Կասիմ-Ժոմարտ Տոկաևի կողմից երեկ Ինֆորմացիայի և հանրային զարգացման նախարարի պաշտոնում Ասքյար Ումարովի նշանակումը իսկական շոկ է առաջացրել Մոսկվայում: Դեռ պաշտոնական արձագանք այս նշանակման վերաբերյալ չկա, սակայն ռուսական դիտորդների կարծիքով, Տոկաևի նման քայլը Կրեմլը անհետևանք չի թողնի:

Բանն այն է, որ Ումարովը հայտնի պանթուրքիստ է, ով երբեք չի թաքցրել իր տեսակետներն ու հայացքները: Մինչ այդ,  նա Ինֆորմացիայի և հանրային զարգացման փոխնախարարի պաշտոնն էր զբաղեցնում: Դեռ 2017-ին իր կողմից ղեկավարվող «Ղազինֆորմը» մի քարտեզ էր թողարկել, որտեղ Ղազախստանի տարածքի մեջ էին ներառված Ռուսաստանի, Ուզբեկստանի և Չինաստանի մի շարք տարածքներ:

Ումարովը նաև Թուրքիայի «Մեծ Թուրան» կոչվող նախագծի ղեկավարն էր հանդիսանում: Ստանձնելով ժամանակին  Թյուրքական ակադեմիայի փոխնախագահի պաշտոնը, Ումարովը պետական մակարդակով այն քարոզն էր իրականացնում Ղազախստանում, համաձայն որի միջինասիական բոլոր հանրապետությունները, պետք է կողմնորոեշվեն դեպի Թուրքիա, թոթափելով և ազատվելով նախկին ԽՍՀՄ-ի և Ռուսաստանի բոլոր նախկին  բարքերից:

Բանը հասել էր նրան, որ նույնիսկ  լինելով Ղազախստանում փոխնախարարի պաշտոնում, Ումարովը զրկվել էր Ռուսաստան մուտք գործելու իրավունքից: Նշենք, որ Մոսկվան նման քայլին դիմում է չափազանց ծայրահեղ դեպքերում և մանավանդ, որ խոսքը վերաբերվում է մի երկրի պաշտոնատար անձի, ով դաշնակցային հարաբերությունների մեջ է գտնվում Ռուսաստանի հետ:

Սա ցույց է տալիս, թե ինչ ծանր վիճակի մեջ է գտնվում Տոկաևը, ով իր կադրային քաղաքականության մեջ ստիպված է գնալ նման քայլի, փորձելով իր շուրջ ձևավորել լայն և իրար հակասող շրջանակներին: Մոսկվայում արդեն ակնարկում են Տոկաևին, օգտագործելով հայտնի ռուսական ասացվածքը՝ «широко шагаешь - штаны порвешь»: Սակայն ինչ քայլի կարող է դիմել Մոսկվան այդ քայլի դիմաց, դեռ հայտնի չէ:

Պարզ է մեկ բան, ռուսները միշտ ուժեղ են եղել իրենց արագ և անսպասելի որոշումներով, սակայն երկարաժամկետ կտրվածքով Մոսկվային միշտ խանգարել է կացնային բնույթի վարվելակերպը և դրա պատճառով է, որ նախկին ԽՍՀՄ-ի հանրապետություններում Մոսկվայի համար պարբերաբար առաջանում են նման անտրամաբանական երևույթներ:

Սա է իրականությունը:

Արտակ Հակոբյան