Թուրքիայի ԿԲ-ն փորձում է սվոփային գործարքներ կնքել Ադրբեջանի եւ ԱՄԷ-ի հետ՝ լիրան փրկելու համար

Թուրքիայի ԿԲ-ն փորձում է սվոփային գործարքներ կնքել Ադրբեջանի եւ ԱՄԷ-ի հետ՝ լիրան փրկելու համար, եւ, հավանաբար, մինչեւ տարեվերջ սպասվում է մեկ գործարք, փոխանցում է Reuters-ը՝ վկայակոչելով երկու իրազեկ աղբյուրներին, փոխանցում է NEWS.am-ը։  

Թուրքիայի կենտրոնական բանկը, որը վերջին երկու տարում որոշակի առաջընթաց է գրանցել արտասահմանյան սվոփ-գծերի օգտագործման հարցում, հրաժարվել է մեկնաբանել Ադրբեջանի եւ Արաբական Միացյալ Էմիրությունների հետ բանակցությունների իրադրությունը։

Հինգշաբթի օրը Ադրբեջանի եւ Էմիրությունների կենտրոնական բանկերը չեն պատասխանել մեկնաբանությունների մասին հարցումներին։ 

Հունիսին Reuters-ը՝ հղում անելով աղբյուրներին, հայտնել էր, որ Թուրքիայի կենտրոնական բանկը մոտ է Ադրբեջանի հետ գործարքի կնքմանը: Ըստ աղբյուրների, որոնք ցանկացել են անանուն մնալ, վերջնական համաձայնություն ձեռք չի բերվել։

«Ադրբեջանի հետ գործարքը գրեթե ավարտված է։Սվոփերի մասին համաձայնագրերը դրական ներդրում կունենան այս ընթացքում, եւ մի քանի երկրների հետ բանակցությունները շարունակվում են»,-ասել է թուրք բարձրաստիճան պաշտոնյան։

Երկրորդ աղբյուրը նշում է, որ Ադրբեջանի հետ սվոփային գործարքի սկզբնական գումարը գուցե փոքր է եղել, բայց աստիճանաբար ավելացել է։ «ԱՄԷ-ի հետ բանակցությունները նույնպես առաջխաղացման փուլում են... Մինչեւ տարեվերջ դրանցից մեկի ստորագրման հավանականությունը շատ մեծ է»,-ասել է նա։ 

Անցյալ ամիս Թուրքիայի Կենտրոնական բանկի ղեկավար Սահապ Քավչիօղլուն Անկարայում հանդիպել է ԱՄԷ պաշտոնյաների հետ՝ նախնական բանակցությունների համար հնարավոր գործարքի շուրջ, եւ նրանք պայմանավորվել են բարելավել համագործակցությունը:

Կենտրոնական բանկը սվոփային գործարքներ է կնքել Չինաստանի, Կատարի եւ Հարավային Կորեայի հետ՝ մոտ 23 մլրդ դոլար արժողությամբ։ Նրանք խրախուսում են տեղական արժույթով առեւտուրը եւ ավելացնում կենտրոնական բանկի համախառն պահուստները:

Փորձելով դանդաղեցնել լիրայի պատմական փլուզումը՝ Կենտրոնական բանկը հայտարարել է այս ամիս շուկայի հինգ ուղղակի ինտերվենցիայի մասին, որոնց ընդհանուր ծավալը կազմում էր մինչեւ 10 միլիարդ դոլար, ասում են բանկիրները: Լիրան այս շաբաթ բարձրացել է ռեկորդային ցածր մակարդակից:

Թուրքիան նախկինում եւս փորձել է գործարքներ կնքել ԱՄՆ-ի, Մեծ Բրիտանիայի, Ռուսաստանի եւ Մալայզիայի կենտրոնական բանկերի հետ, հաղորդում է Reuters-ը: Թուրքիայի կենտրոնական բանկի պահուստները մնում են սպառված 2019-2020 թվականներին մի շարք ինտերվենցիաներից հետո, որոնց ընթացքում մոտ 128 միլիարդ դոլար վաճառվել է պետական ​​բանկերի միջոցով: