Տիգրան Ավինյանը կարող է նշանակվել Զագնեգուրի պղնձամոլիբդենային կոմբինատի տնօրեն. Փաշինյանի ցինիզմը սահմաններ չունի. Լուսանկարներ

Վերլուծելով որոշ երկրներում հեղափոխությունների հետագիծը՝ կարելի է ուղղակի զարմանալ հասարակությունների համար այդ հեղափոխությունների ցինիկ հետեւանքների վրա։ Այս առումով Փաշինյանի հեղափոխությունը շատ նման է Ելցինի 1991թ. հեղափոխությանը: Հիշենք, որ տարիներ առաջ Բորիս Ելցինի հիմնական կարգախոսն էր «պայքար կոռուպցիայի դեմ»։

Նա մեղադրում էր երկրի նախկին կոմունիստական ​​ղեկավարությանը կողոպուտի, թալանի մեջ և նշում էր, որ «նոր Ռուսաստանում» կոռուպցիան կամ պետք է իսպառ վերանա, կամ նվազագույնի հասցվի, բայց այն, ինչ տեղի ունեցավ հետո, ցույց տվեց բոլորին Ելցինի անսահման ցինիզմը։

Բորիս Ելցինի Ռուսաստանը դարձավ աշխարհի ամենակոռումպացված երկիրը, որտեղ հսկա ծովային նավահանգիստները կարելի էր վաճառել 5000 դոլարով։ Ելցինի Ռուսաստանում մարդը զրոյից կարող էր դառնալ դոլարային միլիարդատեր և այս ամենը Բորիս Ելցինի դստեր հետ ծանոթության շնորհիվ։ Եվ որոշակի պահից գրեթե բոլորը հասկացան, որ երկիրը ղեկավարում են հայտնի 7 բանկիրները (Семибанкирщина России):

Համաշխարհային բանկի նախկին փոխնախագահ Ջոն Ստիգլիցը շատ ճշգրիտ բնորոշել էր, որ մարդկության ողջ պատմության ընթացքում կոռուպցիայի այնպիսի ծավալ չի գրանցվել, ինչպիսին Ելցինի օրոք էր ՌԴ-ում։ Հիշեցնենք, որ խոսքը այն Ելցինի մասին է, ով մինչ իշխանության գալը խոսում էր միայն «կոռուպցիայի դեմ պայքարի» մասին։

Այն, ինչ այսօր կատարվում է Հայաստանում, շատ նման է այն իրականությանը, որը կար Ելցինի Ռուսաստանում։ Ինքներդ դատեք՝ կոռուպցիայի դեմ պայքարից խոսող Փաշինյանի կառավարությունն այսօր պետական ​​գնումների մրցույթներ է անցկացնում, որտեղ հաղթանակի համար շատ դեպքերում պայքարում է մեկ մարդ կամ մի կազմակերպություն։ Ի տարբերություն նախորդ իշխանության, ներկայիս իշխանության կոռուպցիոն դրսեւորումները ցինիզմի սահմաններ չունեն: Նախկին իշխանությունն էլ թաթախված էին կոռուպցիայի մեջ, բայց փորձ էր արվում «ամեն ինչ փաթեթավորել քաղաքակիրթ տեսքով»։ Այսօր նույնիսկ այս ձևական կողմը մի կողմ է թողնվել և մոռանալով անցյալի խոստումները՝ լկտիաբար ու ցինիկ կերպով իշխանությունները սկսել են աշխատացնել թալանի մեքենան։

Նիկոլ Փաշինյանը 20 տարի «փրփուրը բերանին» խոսում էր օլիգարխիայի դեմ պայքարի և թալանի մասին, թե իբր պետք է քաղաքական իշխանությունը բաժանել բիզնեսից, որ օլիգարխներ չլինեն Հայաստանում։ Սակայն այսօր Փաշինյանի թիմում ոչ միայն խորհրդարանում հայտնված օլիգարխներ կան, այլ նաև նրանք, ովքեր ցանկանում են «զրոյից օլիգարխ դառնալ»։

Հայաստանը փոքր երկիր է, և այստեղ բոլորը բոլորի մասին ամեն ինչ գիտեն, և Փաշինյանի այս խաբեությունը հաստատ չի ներվի, և եթե իսկապես հաստատվի այն տեղեկությունը, որ Տիգրան Ավինյանը նշանակվելու է Զանգեզուրի կոմբինատի տնօրեն, ապա սա կարձանագրի մեկ բան. Փաշինյանը վերջապես «կփաթեթավորվի նախկին իշխանությունների արժեքներով» և այլևս բարոյական իրավունք չի ունենա խոսելու նախկին իշխանությունների մասին:

Սա՛ է իրականությունը:

Դավիթ Մկրտչյան