Ինչո՞ւ է « ՀայՓոստը» այդքան խայտառակ աշխատում Հայաստանում և ո՞ւմ է պետք նման կազմակերպությունը

Ինչպես բոլորդ գիտեք, Հայփոստը Հայաստանի խոշորագույն ընկերություններից է, որը բնակչությանը տրամադրում է փոստային, ֆինանսական և էլեկտրոնային ծառայություններ։ Այս կառույցն ունի ավելի քան 900 գրասենյակ ողջ Հայաստանում, սակայն, ինչպես պարզվում է, այս կառույցը գործում է «կրիայի արագությամբ», ու սա 21-րդ դարում։

 

Համարվելով ժամանակակից կառույց՝ այն սպասարկում է հաճախորդներին քարանձավային մակարդակով: Օրինակ, մի փոստային բաժանմունքից Հայաստանի մեկ այլ կազմակերպություն նամակ ուղարկելու համար պահանջվում է ոչ ավել, ոչ պակաս, 2 շաբաթ։ Այսինքն՝ քաղաքացին, նամակ բերելով ցանկացած փոստային բաժանմունք, պետք է 2 շաբաթ սպասի, որ իր նամակը հասնի Հայաստանում աշխատող այլ կազմակերպության։ Հասկանու՞մ եք, թե ինչ ամոթալի վիճակ է։ Հասկանու՞մ եք, թե որքան ամոթալի է, որ 21-րդ դարում երկրում կա մի կազմակերպություն, որը քաղաքացիներին մատուցում է նման որակի ծառայություններ։

 

Բայց սա բավարար չէ, և պարզվում է, որ ամբողջ պաշտոնական նամակագրությունը պետք է անցնի Հայփոստով։ Հայտնի չէ, թե ով է կայացրել այս ամոթալի որոշումը, սակայն ակնհայտ է, որ Հայփոստը Հայաստանի ներկայիս իշխանության համակարգում ունի շատ մեծ լոբբիստներ։

 

Որպեսզի հասկանաք, Հայաստանում գործող կազմակերպությանը նոտարական գրասենյակից նամակ ուղարկելու համար, ինչպես պարզվում է, պետք է «այս նամակն անցնի Հայփոստով», և պարզվում է, որ Հայփոստը նամակը ուղարկում է այս կառույցը 14 օրվա ընթացքում: Եվ այս ամենը ոչ թե 11-րդ, այլ 21-րդ դարում է։ Եվ դա չնայած այն հանգամանքին, որ այս գրասենյակը կարող էր մի քանի րոպեի ընթացքում էլեկտրոնային փոստով նամակ ուղարկել ցանկալի այլ կառույցին։

 

Բոլորս էլ հաճախ ասում ենք, որ Հայաստանում շատ խնդիրներ կան, բայց, ինչպես պարզվում է, այդ խնդիրների մոտ 20-30 մտացածին են, ու կարելի է լուծել դրանք մեկ ստորագրությամբ։ Արդյունքում քաղաքացիների կյանքը դժոխքի չի վերածվի։ Իսկ, երբ որեւէ կառույցի մենաշնորհային դիրք է տրվում («Արմենտել»-ի ականջը կանչի), ապա այս կառույցը քաղաքացիների կյանքը դժոխքի է վերածում։