Ալիևի նախապայմանները ՄԱԿ-ի ամբիոնից. «Տրամադրել «Զանգեզուրի միջանցք» և չօգտագործել «Լեռնային Ղարաբաղի Հանրապետություն» եզրույթը

«Հակամարտությունն ավարտված է, ուստի Ադրբեջանն արդեն հայտարարել է Հայաստանի հետ խաղաղության համաձայնագրի շուրջ բանակցություններ սկսելու պատրաստակամության մասին` սահմանների սահմանազատման և սահմանագծման, միմյանց ինքնիշխանության և տարածքային ամբողջականության փոխադարձ ճանաչման սկզբունքով: Նման համաձայնագիրը կարող է մեր տարածաշրջանը վերածել խաղաղության և համագործակցության տարածաշրջանի: Այնուամենայնիվ, մենք դեռ չենք տեսնում Հայաստանի կողմից դրական արձագանք մեր առաջարկին»: Այս մասին ասաց Ադրբեջանի նախագահ Իլհամ Ալիևը՝ ելույթ ունենալով ՄԱԿ-ի Գլխավոր ասամբլեայի 76-րդ նստաշրջանում՝ պետությունների և կառավարությունների ղեկավարների մակարդակով:

«Տրանսպորտային կապերը կարող են դառնալ խաղաղությանը և համագործակցությանը ծառայող ոլորտներից մեկը: Այս համատեքստում «Զանգեզուրի միջանցքը», որը Ադրբեջանի հիմնական մասը կկապի Նախիջևանի Ինքնավար Հանրապետության և Թուրքիայի հետ, նոր հնարավորություններ կստեղծի մեր տարածաշրջանի համար։

Ադրբեջանը նոր իրողություններ է ստեղծել Հարավային Կովկասի տարածաշրջանում, և բոլորը պետք է դա հաշվի առնեն: Հայաստանը պետք է ընտրություն կատարի տարածաշրջանային համագործակցության և հարևանների նկատմամբ անօրինական, չարդարացված տարածքային պահանջների միջև: Միջազգային հանրությունը պետք է դրական դեր խաղա այս իմաստով և հորդորի Հայաստանին գիտակցել, որ խաղաղությանը այլընտրանք չկա: Մենք պետք է վերջ դնենք Հայաստանում ռևանշիզմին և նրա սպառազինմանը ուղղակի կամ անուղղակի աջակցելու փորձերին», ասաց նա։ 

Իլհամ Ալիևը նաև հայտարարեց, որ Ադրբեջանում այլևս չկա «Լեռնային Ղարաբաղ վարչական միավոր»։

«Նախագահի 2021 թվականի հուլիսի 7-ի հրամանագրով մենք ստեղծեցինք Ղարաբաղի և Արևելյան Զանգեզուրի տնտեսական գոտիները: Օգտվելով առիթից, ես կոչ եմ անում ՄԱԿ-ի անդամ երկրներին և ՄԱԿ-ի քարտուղարությանը, երբ անդրադառնում եք մեր տարածքներին, թույլ չտալ օգտագործել իրավական տեսանկյունից գոյություն չունեցող, քաղաքական կողմնակալ և մանիպուլյացիոն բնույթի անուններ», - եզրափակեց նա։ 

Zham.am