Չնայած Էրդողանը ցանկանում է Թուրքիային Հարավային Կովկասում դարձնել խաղացող, երկրում նրա աջակցության վարկանիշը ընկնում է

Օրեր առաջ Թուրքիայի նախագահ Ռեջեփ Թայիփ Էրդողանը հայտարարեց, որ թուրքական բանակը կստանա Bayraktar Akinci նորագույն անօդաչու թռչող սարքերի նոր խմբաքանակ: Այս հայտարարությամբ Էրդողանը ցանկանում էր ընդգծել, որ Թուրքիան Ղարաբաղյան վերջին պատերազմի արդյունքնում դարձել է համաշխարհային թատերաբեմի լուրջ խաղացող: Նրա խոսքով, եթե ընդամենը 10 տարի առաջ երկրի ռազմարդյունաբերական համալիրը 80%-ով կախված էր դրսից մատակարարումներից, ապա այսօր այդ ցուցանիշը կազմում է ընդամենը 20%:

Սակայն, ինչպես պարզվում է, Էրդողանի հնչեցրած այս թվերը մեծ ոգևորություն չառաջացրեցին թուրքական հասարակության մեջ, ինչպես վկայում են վերջին սոցհարցումները, որոնք ցույց են տալիս, որ Էրդողանին աջակցության վարկանիշը լրջորեն նվազել է: 

Մասնավորապես, այսօր նրան աջակցում է Թուրքիայի բնակչության միայն 38%-ը: Բնակչության ավելի քան 51 տոկոսը բացասաբար է գնահատում Թուրքիայի նախագահ Էրդողանի գործունեությունը:

Ավելին, Էրդողանին մերժում են ոչ միայն Թուրքիայի աշխարհիկ բնակչության ավելի քան 90%-ը, այլև հարկ է նշել, որ հասարակության մահմեդական և պահպանողական մասը նույնպես լիովին չի աջակցում Էրդողանին, և նրա վարկանիշը հասարակության այս խմբի շրջանում կազմում է 76%: Միեւնույն ժամանակ, քուրդ բնակչության շրջանում նրա վարկանիշը նվազել է մինչեւ 5 տոկոս:

Ըստ մի շարք թուրք վերլուծաբանների, այսօր Թուրքիայի բնակչության մեծ մասին ավելի շատ հետաքրքրում են ներքին խնդիրները, քան արտաքին ձեռքբերումները: Օրինակ, անտառային հրդեհների խնդիրներն ու թուրքական լիրայի անկումն ուղղակիորեն իջեցրեցին թուրք հասարակության մեջ Էրդողանին աջակցության վարկանիշը, ինչն իր հերթին ենթադրում է, որ հաջորդ ընտրություններից առաջ Էրդողանը կփորձի փոխհատուցել իր վարկանիշային կորուստներն ավելի ագրեսիվ վարքագծով արտաքին քաղաքականության ասպարեզում:

Քանզի հայտնի է, որ ոչ մի բան ավելի լավ հասարակությանը չի համախմբում առաջնորդի շուրջ, ինչպես արտաքին շոշափելի սպառնալիքներն են:

Արտակ Հակոբյան