Թեհրանի արձագանքը Փաշինյանի առաջարկին չուշացավ

ԵԱՀԿ Մինսկի խմբի համանախագահներից Ֆրանսիայի և ԱՄՆ-ի դիտորդներ տարածաշրջան բերելու Փաշինյանի վերջին առաջարկը մեծապես նյարդայնացրել է ոչ միայն Մոսկվային, այլև պաշտոնական Թեհրանին: Հասկանալի է, որ պաշտոնական տեսանկյունից ոչ Մոսկվան, ոչ էլ Թեհրանը չեն կարող քննադատելլ Նիկոլի առաջարկը, բայց անուղղակիորեն նրանք ցույց են տալիս իրենց վերաբերմունքը Երեւանի նկատմամբ:

Օրինակ, օրեր առաջ Իրանի էներգետիկայի նախարար Ռեզա Արդականյանը միջոցառումներից մեկի ժամանակ ուղղակիորեն մեղադրեց Հայաստանին Արաքս գետի մաքրման ուղղությամբ գործողությունների անբավարար լինելու համար:

«Հայաստանից գետ մտնող շատ կեղտոտ ջրերը վնասում են Արաքս գետը», - ասաց իրանցի նախարարը: Նա նաև նշեց, որ Հայաստանը պետք է ամեն ինչ անի գետը մաքրելու աշխատանքները բարելավելու համար: Նախարարը նաև հիշեցրեց, որ մոտ ապագայում գետի մաքրման հետ կապված խնդիրները քննարկելու համար նախապատրաստվում է 4 պետությունների` Հայաստանի, Իրանի, Ադրբեջանի և Թուրքիայի ներկայացուցիչների հանդիպումը:

Զարմանալի չէ, որ այս օրերին Իրանից Երեւանի հասցեին հնչում են նման քննադատություններ: Սովորաբար Իրանը նախընտրում է քննարկել նման հարցերը դռնփակ ֆորմատով, սակայն հայ-ադրբեջանական սահմանի շուրջ ծավալվող վերջին իրադարձությունները, մասնավորապես Ֆրանսիայից և ԱՄՆ-ից տարածաշրջանում դիտորդներ բերելու Նիկոլ Փաշինյանի առաջարկը, խիստ նյարդայնացնում է պաշտոնական Թեհրանին: Այս մտահոգության պատճառով է, որ Իրանի արտգործնախարարը վերջին օրերին այցելություններ է կատարել Բաքու և Երևան:

Թեհրանը հստակ հասկացնում է, որ տարածաշրջանում այլ ռազմական ներկայություն Իրանի համար անընդունելի է: Փաստորեն, կարելի է ասել, որ անցած 30 տարիների ընթացքում Իրանը երբեք չի ունեցել այնպիսի մտահոգություններ Հայաստանի վերաբերյալ, որոնք նա ունի այսօր:

Հիշենք, որ, օրինակ, ղարաբաղյան առաջին պատերազմի ժամանակ հայ-իրանական սահմանը բաց էր մեր երկրի համար ռազմավարական նշանակություն ունեցող մի շարք ապրանքների մատակարարման համար: Մինչդեռ վերջին պատերազմի ընթացքում, առաջին 2 շաբաթվա ընթացքում, Իրանը թույլ չտվեց ժամանակակից ռազմական տեխնիկա իր օդային տարածքով տեղափոխել Հայաստան՝ դրա համար շատ տարբեր պատճառներ բերելով:

Իրանի պաշտոնյաները, փակ դռների ետևում նշում էին, որ պաշտոնական Թեհրանը կտրուկ դժգոհ է Երևանի գործողություններից, որը մտադիր էր դեսպանություն բացել Թել Ավիվում: Եվ երկրորդ անգամ Իրանն իր դժգոհությունն է հայտնում Փաշինյանի վերջին առաջարկների կապակցությամբ, բայց դա անում է ավելի փակ կերպով, ինչը նշանակում է, որ Փաշինյանի կառավարությունը լիովին ձախողել է իր արտաքին քաղաքականությունը՝ հիմնովին փչացնելով մեր ավանդական գործընկերների հետ հարաբերությունները:

Սա՛ է իրականությունը։