Ասուլիսը ծանր նստեց. Արայիկ Հարությունյանը ազատել է փոխնախարարին

Այսօր Արցախի Արտակարգ իրավիճակների փոխնախարար, գերիների հարցով զբաղվող Բորիս Ավագյանի` Հայաստանի խորհրդարանում ունեցած քննարկումից անմիջապես հետո Արցախի իշխանությունները որոշել են նրան ազատել փոխնախարարի փաշտոնից։ Պատճառը, թերեւս, Ավագյանի մի շարք աղմկահարույց հայտարարություններն են առ այն, որ ՀՀ իշխանությունները պատշաճ չեն զբաղվում գերիների վերադարձի խնդրով։

Քննարկումն ավարտվելուց հետո ԱՀ իշխանությունները հայտարարություն տարածեցին, թե Ավագյանը պաշտոնական  տեսակետ չի ներկայացնում, պաշտոն չի զբաղեցնում։ Իսկ մինչ այդ, քննարկումից անմիջապես հետո, երբ նա դեռ չի հասցրել հեռանալ խորհրդարանի շենքից, նրան է զանգահարել Արցախի ԱԺ նախագահ Արթուր Թովմասյանը եւ տեղեկացրել, որ Արայիկ Հարությունյանն ուզում է իրեն ազատել աշխատանքից։

Ինֆորմացիան «Հրապարակի» հետ զրույցում հաստատեց «Իմ քայլից» հեռացած պատգամավոր Վարդան Աթաբեկյանը, ով Ավագյանին հրավիրել էր խորհրդարան եւ նրա հետ է եղել Թովմասյանի զանգի ժամանակ։