Ու՞մ կցանկանա տեսնել Սերժ Սարգսյանը Ազգային ժողովի նախագահի պաշտոնում

Բաղրամյան 26-ին մոտ կանգնած լրատվամիջոցները հիմնականում նշում են չորս անուն, որոնք համարվում են ՀՀ Ազգային ժողովի նախագահի պոտենցիալ թեկնածուներ: Դրանք են՝ պատգամավոր Կարեն Կարապետյանը, Ազգային ժողովի փոխնախագահ Էդուարդ Շարմազանովը, ՀՀԿ փոխնախագահ Արմեն Աշոտյանը և Արդարադատության արդեն նախկին նախարար Արփինե Հովհաննիսյանը:

Այս ցանկից արդեն պետք է բացառել Կարեն Կարապետյանին: Նախ նա այսօր արդեն իսկ հայտարարեց, որ չունի մտադրություն Ազգային ժողովի նախագահ դառնալու, երկրորդ՝ Սերժ Սարգսյանը ռիսկի չի գնա Ազգային ժողովի նախագահի պաշտոնը հանձնել Կարեն Կարապետյանին, քանզի այդ քայլով էապես կուժեղանան Սամվել Կարապետյանի դիրքերը իշխանական համակարգում, և ճիշտ հակառակը՝ Սերժ Սարգսյանը կդառնա «կաղ բադ» նախագահ:

Անշուշտ, իշխանությունը նոր դեմքով հանդես գալու լավագույն տարբերակը կլիներ Արփինե Հովհաննիսյանը, սակայն Սերժ Սարգսյանը չի գնա այս քայլին նույնպես, քանզի այս մեկ տարվա անցումային փուլում Ազգային ժողովի նախագահի դերը չափազանց մեծ է լինելու, և Արփինե Հովհաննիսյանը դեռ չունի այդ վստահությունը Սերժ Սարգսյանի մոտ: Նա ավելի շուտ գեղեցիկ «վիտրինայի» դեր կարող է կատարել իշխանության համար: Այդ իսկ պատճառով ամենայն հավանականությամբ Արփինե Հովհաննիսյանին կտան Ազգային ժողովի փոխնախագահի պաշտոնը:

Ցանկում մնում է երկու թեկնածու՝ կամ Արմեն Աշոտյանը, կամ Էդուարդ Շարմազանովը: Թերևս այս երկու անձերից պետք է ընտրի Սերժ Սարգսյանը: Եւ այստեղ առավել մեծ շանսեր ունի Շարմազանովը: Երկուսն էլ, իհարկե, վստահելի են Սերժ Սարգսյանի համար, սակայն Արմեն Աշոտյանի ընտրության պարագայում լուրջ դժգոհություն կարող է առաջանալ ԲՀԿ-ում: Այս հանգամանքը Սերժ Սարգսյանը հաշվի չառնել չի կարող, թեև այս անձանց լավ ճանաչողները նշում են, որ Արմեն Աշոտյանը Էդուարդ Շարմազանովից ավելի ճկուն և լիբերալ արժեհամակարգ ունի: Մինչդեռ Շարմազանովը համարվում է «ուղղափառ» կուսակցական: Եւ հենց այդ հանգամանքնել խոսում է հօգուտ Շարմազանովի: Այս քայլով Սերժ Սարգսյանը գրեթե կավարտի իր իշխանության «երիտասարդացման» գործընթացը, խաղից դուրս հանելով կուսակցության «հին գվարդիան»:

Հակոբ Կարապետյան