Հեղափոխության «պտուղները». նրանց այլևս չենք տեսնի նոր խորհրդարանում

ՀՀԿ նախընտրական ցուցակն այս անգամ ավելի բծախնդրորեն է կազմված՝  Հանրապետական խմբակցության պատգամավորների մի ստվար հատված դուրս է մնացել ընտրական ցուցակից: ՀՀԿ-ն, կարծես թե, որոշել է երիտասարդացնել և նոր շունչ հաղորդել իր թիմին, չնայած դրա արդյունավետության մասին դեռ վաղ է խոսել, հատկապես, որ նոր ընտրված կադրերի մեծ մասը հանրության անհայտ և ոչինչ չասող անուններ են:
Հաջորդ գումարման խորհրդարան անցնելու առումով այսօրվա 50 հոգանոց Հանրապետական խմբակցության անդամների միայն կեսի բախտն է բերել: Մնացածը հրաժեշտ կտան պատգամավորական մանդատներին՝  իրենց տեղերը զիջելով նոր կադրերին:

Այսպիսով, նոր խորհրդարանում չենք տեսնի խորհրդարանի «համն ու հոտը» ապահովող Գալուստ Սահակյանին և Սեյրան Սարոյանին, ովքեր իրենց հումորով և խարիզմայով կարողանում էին ցրել  անգամ ամենալարված իրավիճակները:

ԱԺ մանկաբույժ նախագահ Արա Բաբլոյանին ևս չենք տեսնի ապագա խորհրդարանում:

7-րդ գումարման Ազգային Ժողովը կլինի առանց  նույն անուն-ազգանուն ունեցող Հակոբ Ռազմիկի Հակոբյանի և Հակոբ Գառնիկի Հակոբյանի:

Խորհրդարանի հնաբնակ պատգամավոր Խոսրով Հարությունյանն այսքանով, կարծես թե, ավարտում է իր պատգամավորական գործունեությունը՝  նա ևս ներառված չէ նախընտրական ցուցակում:
Նախկին գլխավոր դատախազ Գևորգ Կոստանյանին ևս չենք տեսնի պատգամավորական գործունեությամբ զբաղվելիս, վերջերս նա տեղեկացրեց նաև, որ նոր աշխատանքի առաջարկ ունի և մտադիր է ընդունել այն: 

ՀՀԿ  երիտթևի բազմամյա  ղեկավար Կարեն Ավագյանը ևս չի լինի նոր խորհրդարանում:

Գագիկ Բեգլարյանի եղբայրը՝  Հակոբ Բեգլարյանը, ով խորհրդարան էր անցել ռեյտինգային ընտրակարգով, ևս ներառված չէ նախընտրական ցուցակում:

Արայիկ Գրիգորյանը՝  Ավշարի Արայիկը, ևս դուրս է մնացել ցուցակից: Նույն բախտին է արժանացել նաև մյուս գործարար պատգամավորը՝ Արկադի Համբարձումյանը:
Մեծահարուստ Սամվել Կարապետյանի եղբայրը՝  Կարեն Կարապետյանը, նույնպես ապագա խորհրդարանում չի լինի:

Խորհրդարանում չի լինի նաև ՀՀԿ ֆրակցիայի քարտուղարը՝ Գագիկ Մելիքյանը:
Նաիրա Կարապետյանը, ով խորհրդարանում վերջերս փոխարինեց Ռուզաննա Մուրադյանին, նույնպես ներառված չէ ՀՀԿ ցուցակում:

Բնապահպանության նախկին նախարար Արամ Հարությունյանը ևս ապագա խորհրդարանում չի լինի:

Նոր խորհրդարանում չենք տեսնի նաև ԴԱՀԿ նախկին պետ Միհրան Պողոսյանին, Սերժ Սարգսյանի նախկին խոսնակ Արման Սաղաթելյանին, նախկին ոստիկանապետ Ալիկ Սարգսյանին, Տարոն Մարգարյանի աներորդի Ռոբերտ Սարգսյանին, նախկին վարչապետ Կարեն Կարապետյանի խոսնակ Շուշան Սարդարյանին:

Խորհրդարանում չեն  լինի նաև ՀՀԿ ցուցակով խորհրդարան անցած և վերջերս ֆրակցիան լքած Սամվել Ալեքսանյանը, Աշոտ Արսենյանը, Արման Սահակյանը:  

Խորհրդարանում չեն լինի նաև՝

Կորյուն Նահապետյանը,
Սամվել Նիկոյանը,
Միհրան Հակոբյանը,
Կարեն Բեքարյանը,
Ջեմմա Բաղդասարյանը,
Հերմինե Նաղդալյանը,
Նաիրի Սահակյանը,
Ավետ Սարգսյանը,
Սամվել Ֆարմանյանը,
Ռուստամ Մախմուդյանը,
Կնյազ Հասանովը,
Արսեն Միխայլովը:

Պատրաստեց Ակաթի Վահանյանը