Արեգնազ Մանուկյանը ձերբակալվել է՝ դատարան ներկայացնելու համար

Քրեական վարույթի շրջանակում ձերբակալվել է Արեգնազ Մանուկյանը՝ դատարան ներկայացնելու համար։ Այս մասին Panorama.am-ին հայտնեցին քննչական կոմիտեից։ 

Ավելի վաղ հայտնել էինք՝ Մայր Հայաստան» կուսակցության վարչության անդամ, նախկին պատգամավոր  Արեգնազ Մանուկյանը տեսանյութ էր հրապարակել ու հայտնել, որ վաղ առավոտյան իրավապահները մուտք են գործել իր բնակարան։ Այնուհետև Երևանի ավագանու «Մայր Հայաստան» խմբակցության ղեկավար Մանուկ Սուքիասյանը հայտնեց, որ բերման են ենթարկել «Մայր Հայաստան» կուսակցության վարչության անդամ Արեգնազ Մանուկյանին։

Մեր կողմից նկատենք, որ սա ոչ թե պարզապես քաղաքական հետապնդում է, այլ նաև խոսքի իրավունքից մարդուն զրկելու բացահայտ դրսևորում: Հասկանալի է, որ Արեգնազ Մանուկյանը հայտնվել է բռնատիրական ռեժիմի թիրախում հենց հրապարակային ակտիվության պատճառով::
Ի դեպ, վերջերս «ժանդարմերիան» հաճախ է գործածում «քրեական վարույթի շրջանակներում»: Այդ «շրջանակներով» փորձում են բացատրել կամ հիմնավորել իրենց ցանկացած այլանդակ, անընկալելի դրսևոում, լինի դա զանգվածային խուզարկություն, տարիքով մարդու վրա 10-15 հոգով վրա տալ, թե, օրինակ, առյուծին առհավետ քնեցնել:
Բայց ոչ մի կոնկրետություն, օրինակ, ինչի՞ մեջ են մեղադրում, ի՞նչ արարքի համար, քրեական օրենսգրքի ո՞ր հոդվածի հատկանիշներով: 
Չէ, ի՞նչ կարիք կա ուղեղներին զոռ տալու, եթե կարելի է տափակ ու ոչինչ չասող արտահայտություն անել ու լղոզել: Կարևորը մարդ լինի՝ «քրեական վարույթի շրջանակ» կգտնվի: Ի՜նչ իրավունք, ի՜նչ օրենք: