ՔՊ-ն դեմ քվեարկեց թոշակների բարձրացմանը

ԱԺ «Հայաստան» խմբակցության կողմից ներկայացաված «Պետական կենսաթոշակների մասին» օրենքում լրացումներ կատարելու մաuին նախագիծը չընդունվեց։ ՔՊ խմբակցությունը դեմ քվեարկեց. կողմ՝ 32, դեմ՝ 58, ձեռնպահ՝ 1։

Նախքան քվեարկությունը, ԱԺ « Քաղաքացիական պայմանագիր» խմբակցության ղեկավար Հայկ Կոնջորյանն ասաց. «Այս հարցը մենք երեկ մանրամասն քննարկել ենք։  ԱԺ Գլխադասային  հանձնաժողովը մասնագիտական քննարկում է  արել, բոլոր հիմնավորումները բերվել են, որ կառավարության ծրագրով այն թիրախը, որ սահմանված է, մենք  շարժվում ենք դեպի այդ թիրախը, և  ընդդիմության ներկայացրած նախագիծը նույն թիրախին հասնելու  փորձ է, պարզապես օրենսդրական կարգավորմամբ։ Մենք նշել ենք, որ մենք մեր հանձնառության տերն ենք, և շարժվում ենք այդ ուղղությամբ։

Քանի որ հարցը որոշակի էմոցիոնալ կողմ ունի,  ընդդիմությունը շահարկում էր, թե իբրև ՔՊ-ն դեմ է թոշակների ավելացմանը, նշեմ, որ 2018 թվականից մինչ այսօր կառավարությունը, ըստ էության, նվազագույն թոշակներն ավելացրել է  տարեկան 380 միլիոն դոլարի չափով, այն թիրախը, որը մենք ունենք կառավարության ծրագրով, շարժվում ենք  այդ թիրախի ուղղությամբ։

Ընդդիմության ներկայացրած այս նախագիծը ինքնանպատակ է, հավատարիմ ենք մնում գլխադասային հանձնաժողովի ներկայացրած դիրքորոշմանը, «Քաղաքացիական պայմանագիր» խմբակցությունը դեմ է քվեարկելու այս նախագծին»։

«Հայաստան» խմբակցության քարտուղար Արծվիկ Մինասյանն ասաց. «Բարձրացվող թոշակները ոչ միայն հեռու են իրենց իսկ տված խոստումներից, նաև Հայաստանի պետական պարտքն այս տարիներին  աճեցրել են մոտ 7 միլիարդ դոլարով, այս պայմաններում հերոսաբար ներկայացում են, թե գնում են այդ թիրախին։ Հենց նոր հայտարարվեց, որ իրենք իրենց հայտարարած թիրախին դեմ են քվեարկում։ Դեմ քվեարկելով այս այս օրենքի նախագծին, դեմ եք քվեարկում  ձեր իսկ հայտարարած թիրախին։

Ավելին՝ հենց նոր ՔՊ-ն հայտարարեց, որ հեթական անգամ դրժում է  իր խոստումները»։

«Պատիվ ունեմ» խմբակցության ղեկավար Հայկ Մամիջանյանն ասաց. «Հայաստանի քաղաքացիներին խաբելու չափ ու սահման կա։

Քանի որ  կենսաթոշակներն ավելացվել են մի քանի հազար դրամով,  նախարարների աշխատավարձերը կրկնապատկվել են, նաև ժամանակին գաղտնի հրամանով, ՔՊ խմբակցության ղեկավարը որոշեց դնի,  բազմապատկի բոլոր թոշակառուների թիվը, բազմապատկի մի քանի հազար դրամով, ու այդպես ներկայացնի որպես  մանիպուլյացիա։ Այդպես լավ չի, այդ 7  տարվա ընթացում տված թոշակները գումարեք, ներկայացրեք ու խաբեք ժողովորդին»։

Մանրամասն՝ տեսանյութում։
Աղբյուրը` Panorama.am