Հայ պատգամավորին հարվածած կարմրաբերետներից 1-ը «գործից» ազատվել է, հերթը մյուսներինն է

«Հրապարակը» գրում է. «Մայիսի 27-ին մայրաքաղաքի Հանրապետության փողոցում ԱԺ պատգամավորի և ոստիկանների միջև տեղի ունեցած միջադեպի առնչությամբ ՆԳՆ ներքին անվտանգության և հակակոռուպցիոն վարչությունում նշանակվել էր ծառայողական քննություն, ինչի արդյունքում դադարեցվել են ոստիկանության ծառայողի լիազորությունները։ Այս մասին հայտնում է ՀՀ ՆԳՆ-ն:
«Հրապարակի» տեղելություններով աշխատանքից ազատվել է Աշոտ Սիմոնյանին ծեծող կարմիր բերետավորը: Վերջինս Գեւորգ Մկրտչյանն է: Նա Կարմիր բերետների գումարտակում վաշտի հրամանատար է:

Նշենք, որ Գեւորգ Մկրտչյանի լիազորությունները, նախկինում, մի քանի անգամ դադարեցված են եղել՝ խոշտանգումների դեպքերով: Իսկ մի դեպքով էլ, ներքին անվտանգության վարչության ծառայությունում բացված ծառայողական քննությունից հետո, կոչումը իջեցրել են»:
--
Մեր կողմից հավելենք, որ «ծառայողական քննությունը», որի մասին հայտարարում է ՆԳՆ-ն ոչ այլ ինչ է, եթե ոչ ամենաուղղակի ծաղրանք՝ հասարակության և օրենքների նկատմամբ: Կատարվել է քրեական հանցագործություն, ըստ որում, հանրության ու շրջապատի համար ակնհայտորեն վտանգ ներկայացնող անձի կողմից: Ի՞նչ «ծառայողական քննություն» պետք է անհապաղ հարուցվի քրեական գործ, իսկ ոստիկանության նշված ու մի շարք չնշված «կարմրաբերետ» ներկայացուցիչներ ներգրավվեն որպես առնվազն կասկածյալներ՝ մեղադրյալի վերածվելու հեռանկարով: 
Ավելին, տեսանյութերում հստակ երևում է, որ Աշոտ Սիմոնյանի վրա հարձակվում ու հարվածում են մի քանի կարմրաբերետներ, իսկ «ծառայողական քննությամբ» հիշատակվողը նախահարձակն է:
Մի խոսքով, պետք է հարուցվի քրեական գործ, իրականացվի ամենախիստ քննություն և դատ: Առհասարակ, ոստիկանության «կարմրաբերետ» ստորաբաժանումն ավելի շուտ նման է կազմակերպված հանցավոր խմբի, «ջարդարարների» խմբավորման, քան թե՝ իրավապահ մարմնի ստորաբաժանման: Ու վաղուց ժամանակն է կտրուկ դնել տվյալ ստորաբաժանման ներկայիս անձնակազմը լուծարելու (արձակելու), իսկ քաղաքացիների նկատմամբ խոշտանգումային վարք դրսևորածներին քրեական խստագույն պատասխանատվության ենթարկելու հարցը: 
Ապագա Հայաստանին նման «ոստիկաններ» ընդհանրապես պետք չեն: 
Տեսանյութից սքրին-շոթերով արված նկարներում կարմիր շրջանակի մեջ են այն կարմրաբերետներից երկուսը, որոնք ևս հարվածում էին ԱԺ պատգամավորին: Տեսանյութերի հիան վրա ամենևին դժվար չէ նրանց բոլորին նույնականացնելն ու պատասխանատվության կանչելն ու ենթարկելը: Իսկ դա անխուսափելիորեն լինելու է: Փաշինյանը հավերժ չէ:
Տեսանյութը՝ «Փաստինֆո»-ի յութուբյան էջից: