ՔՊԿ-ականներն այսօր իրենք են դարձել իրենց երազած թալանչիները և մտնում են քաղաքացիների գրպանը․ «Մայր Հայաստան» խմբակցության անդամ (տեսանյութ)

Երևանի ավագանու նիստում «Մայր Հայաստան» խմբակցության անդամ Արշակ Սարգսյանի ելույթը կարմիր կետագծերի վճարի թանկացման դեմ․
Սիրելի քաղաքացինե՛ր, 2018-ին ժողովրդի արդար դժգոհությունն ու մեծ սպասելիքներն օգտագործելով՝ ստի ու կեղծիքի այս իշխանությունները նստեցին իրենց աթոռներին ու սկսեցին խաբել բոլոր հարցերում։
Օրինակ, պոպուլիզմն ու դեմագոգիան գործի դնելով և խաղալով մարդկանց հույզերի վրա՝ հպարտ քաղաքացիներին խոստացան վերացնել կարմիր կետագծերն ու արագաչափերը, մարդկանց չդարձնել տուգանքի ու թալանի մատերիալ։ Բայց այսօր իրենք են դարձել իրենց երազած թալանչիները և մտնում են քաղաքացիների գրպանը։
2018-ին Փաշինյանը տարբեր իրերով փակում էր արագաչափերը, իսկ իր իշխանության օրոք դրանք ոչ միայն չվերացան (ինչպես, որ խոստացել էր), այլ մի բան էլ ավելացան։ Իսկ հիմա էլ շուրջ 13 անգամ ուզում են ավելացնել կարմիր կետագծերով կայանատեղիների վճարը, նաև բազմաթիվ այլ վճարներ և տեղական տուրքեր են թանկացնում։
Այս իշխանություններին բնորոշ է պոպուլիզմը, դեմագոգիան, ցինիզմն ու խաբեբայությունը։
3 ամիս առաջ՝ ավագանու ընտրությունների քարոզարշավի ժամանակ երևանցիներին խոստանում էին՝ ասեք, կանենք։ Իսկ հիմա, երբ իրենց քույր կազմակերպության ու ինչ-ինչ ստվերային պայմանավորվածությունների շնորհիվ մի կերպ կարողացան զավթել քաղաքապետի աթոռը, անամոթաբար հայտարարում են՝ ինչ ասենք, դա էլ կանեք։ Հիմա ասում են, որ շեշտակիորեն թանկացնելու են կարմիր կետագծերի համար վճարը, ինչը ոչ միայն չի լուծի առկա խնդիրները, այլև է՛լ ավելի կխորացնի դրանք։

Մասնավորապես՝

1․ հասարակական տրանսպորտն է՛լ ավելի կգերծանրաբեռնվի։

2․ Դեպի մայրաքաղաքի կենտրոն գնացող տաքսիների գների շեշտակի կբարձրանան։

3․ Քաղաքի կենտրոնում և Արաբկիրում կստանանք մեքենաներով խցանված բակեր և մայթեր։

Եվ սրանք խնդիրների մի չնչին մասն է միայն։ Իսկ արդյունքում կրկին կտուժի թալանի մատերիալ դարձած քաղաքացին։

Ի՞նչ է առաջարկում «Մայր Հայաստանը»

Առաջին՝

Առաջիկա չորս տարիների ընթացքում քաղաքային տնտեսությանը հատկացված ռեսուրսների զգալի մասը ծախսել քաղաքում նոր ավտոկայանատեղիներ կառուցելու նպատակով, որոնք կլինեն հիմնական փողոցներից հեռու: Այդ կայանատեղիները կարող են լինել և՛ վերգետնյա, և՛ ստորգետնյա:

Երկրորդ՝

Այդ կայանատեղիների կառուցումից հետո քաղաքային իշխանությունը պիտի որոշում կայացնի Երևանի բոլոր խոշոր փողոցներից հանել այսօրվա կայանատեղիների համար սահմանված կարմիր գծերը և այդ ազատված հատվածը տրամադրել հատուկ երթևեկելու համար՝ բացառապես հանրային տրանսպորտին և տաքսիներին: Հանրային տրանսպորտի բոլոր միջոցները պիտի ունենան սարքեր, որպեսզի քաղաքացին կարողանա օգտվել օնլայն տրանսպորտից կամ նման այլ ծառայություններից: Արդյունքում քաղաքացին օնլայն ռեժիմով կկարողանա լիարժեքորեն տեղեկանալ իր ուզած տրանսպորտի աշխատանքային գրաֆիկից:

Երրորդ՝

Միայն դրանից հետո կարելի կլինի քաղաքի հիմնական խոշոր ճանապարհների հետ հատվող երկրորդական բնույթի ճանապարհների ավտոկայանատեղիների սակագները բարձրացնել, որտեղ չի գործի տրանսպորտը: Օրինակ՝ Պուշկինի կամ Բյուզանդի փողոցային ավտոկայանատեղիների սակագները կարելի կլինի վերանայել: Քանի որ այդ դեպքում վարորդը կունենա ընտրության այլնտրանք՝ իր մեքենան կանգնեցնել հատուկ կայանատեղում, թե՞ ընդանրապես մեքենան դուրս չհանել և օգտվել բացառապես հանրային տրանսպորտից, քանի որ այդ տրանսպորտի երթևեկության ժամանակը կանխատեսելի կլինի:

Մեր առաջարկների իրականացման դեպքում մենք կունենանք՝

1. Բարեփոխված տրանսպորտ,

2. Քաղաքացին կստանա ընտրության հնարավորություն՝ երթևեկել տրանսպորտով կամ սեփական մեքենայով,

3. Քաղաքը կբեռնաթափվի մեքենաներից, և մենք կունենանք ժամանակակից Երևան, որը ոչնչով չի տարբերվի այլ եվրոպական քաղաքներից,

4. Այսօր հենց այդ ճանապարհով են զարգանում, օրինակ, Թբիլիսին կամ Մոսկվան։

5. Մենք կիսում ենք այն մոտեցումը, որ Երևանում գերակա պիտի լինի ոչ թե մեքենայի, այլ հետիոտնի շահը: Բայց դա պետք է անել խելամտորեն:

Եվ վերջում։ Սիրելի՛ քաղաքացիներ։

Ստի ու կեղծիքի այս իշխանությունները ձեզ խաբել են, խաբում են ու շարունակում են խաբել, քանի դեռ հանդուրժում եք։ Թույլ մի՛ տվեք, որ ձեզ խաբեն։