Ընտրությունն անցավ, սկսվեց խոստումների «քցոցին»

Թե ինչ «քաղաքական» ձեռնածություններով Տիգրան Ավինյանը դարձավ, ավելի ճիշտ՝ դարձցվցվեց Երևանի քաղաքապետ, հանրահայտ է: Նախընտրական արշավի ընթացքում նրա ու ՔՊ-ի հմիանական կռվաններից մեկն այն էր, թե թարմացրել են քաղաքային տրանսպորտը, նոր ավտոբուսներ են բերել ու էլի են բերելու, ըստ որում, հիմնականում՝ էլեկտրաշարժիչով, այսինքն՝ «էկոլոգիապես մաքուր»: Ընտրությունն անցավ, սկսվեց խոստումների «քցոցին»: 
Ահավասիկ, News.am-ը հաղորդում է, որ քաղաքապետարանի այսօրվա գործակարգավարական խորհրդակցության ընթացքում Ավինյանն ասել է, որ 171 հատ 8,6 մետրանոց ավտոբուսները չեն լինի էլեկտրական, սակայն 18 մետրանոց ավտոբուսների մասով քննարկվելու է միայն էլեկտրական ավտոբուսներ բերելու տարբերակը: Տրանսպորտի վարչության պետ Վազգեն Հարությունյանն էլ նշել է. «Բնական գազով աշխատող 8,6 մետրանոց ավտոբուսների մասով գնման հայտն արդեն ուղարկվել է գնումների վարչություն: Նախկինում 150 ավտոբուսի մրցույթի ժամանակ մենք թվաքանակը հասցրեցինք 180-ի եւ գինն իջավ»: Նա նաեւ տեղեկացրեց, որ մեկ ավտոբուսին գինը կազմում է 38-39 մլն դրամ՝ նախկին 44 մլն-ի փոխարեն:
Ի դեպ, չմոռանանք հավելել, որ այդքան գոված-գովերգված ավտոբուսները ձեռք են բերվել ահռելի վարկով, պարզ ասած՝ պարտքով, որի համար, մեծ հաշվով, վճարելու են հարկատուները: