Կոչ ենք անում դադարեցնել ռազմական գործողությունները. ՌԴ ԱԳՆ-ն` ԼՂ–ում էսկալացիայի մասին. Տեսանյութ

Մոսկվան խորապես անհանգստացած է Լեռնային Ղարաբաղում իրադրության կտրուկ էսկալացիայից։ Այսօրվա ճեպազրույցում այս հայտարարությունն է արել ՌԴ ԱԳՆ պաշտոնական ներկայացուցիչ Մարիա Զախարովան։

«Տեղեկություններ կան ադրբեջանական զինված ուժերի կողմից տարածաշրջանում հակաահաբեկչական գործողություններ սկսելու և, ինչպես Բաքուն է հայտարարում, տեղի հայկական զինված կազմավորումների պատասխան գործողությունների մասին։ Ռուսական կողմը հակամարտող կողմերին կոչ է անում դադարեցնել արյունահեղությունը, անհապաղ դադարեցնել ռազմական գործողությունները և վերադառնալ քաղաքական-դիվանագիտական կարգավորման ուղուն»,-ասել է նա։ Զախարովան ընդգծել է, որ ղարաբաղյան հիմնախնդրի խաղաղ լուծմանն ուղղված բոլոր քայլերը շարադրված են Ռուսաստանի, Ադրբեջանի և Հայաստանի ղեկավարների եռակողմ հայտարարություններում, որոնք ընդունվել են 2020-2021 թվականներին։ Նրա խոսքով` վերջին շրջանում Ռուսաստանի և միջազգային այլ միջնորդների ջանքերով լուրջ նախադրյալներ են ձևավորվել ղարաբաղյան հիմնախնդիրը խաղաղ ճանապարհով լուծելու համար։

«Խոսքը հումանիտար օգնության մատակարարումների մեկնարկի մասին է, որոնց մասին մենք խոսել ենք, մասնավորապես` Ղարաբաղի բնակչության համար մարդասիրական օգնության մասին։ Դա ստեղծել և ստեղծում է բարենպաստ ֆոն Բաքվի և Ստեփանակերտի միջև ուղիղ երկխոսության վերագործարկման համար»,-հավելել է Զախարովան։ Ռուսաստանի ԱԳՆ ներկայացուցիչը շեշտել է, որ ստեղծված իրավիճակում ՌԴ խաղաղապահ առաքելությունը շարունակում է կատարել իր առջև դրված խնդիրները։ Մոսկվան ելնում է նրանից, որ խաղաղապահների անվտանգությունն անվերապահորեն կապահովեն բոլոր կողմերը։

Զախարովան շեշտել է, որ ՌԴ խաղաղապահ առաքելության հրամանատարությունը մշտական կապի մեջ է Ղարաբաղի հայերի և Ադրբեջանի իշխանությունների ներկայացուցիչների հետ՝ հրադադարի պահպանման և նշված եռակողմ պայմանավորվածությունների ամենաբարձր մակարդակով կատարմանը վերադառնալու նպատակով։