Երևանի ընդհանուր իրավասության դատարանի նախագահի պաշտոնակատարը Գագիկ Պողոսյանն է
Երևանի ընդհանուր իրավասության դատարանի նախագահի պաշտոնակատարը դատավոր Գագիկ Պողոսյանն է, որը, ըստ շրջանառվող լուրերի, նախկին զինդատախազ, ԲԴԽ նախագահի նախկին պաշտոնակատար Գագիկ Ջհանգիրյանի թեկնածուն էր՝ դատարանի նախագահի պաշտոնում։
«Փաստինֆո»-ն արդեն տեղեկացրել է, որ Երևան քաղաքի առաջին ատյանի ընդհանուր իրավասության դատարանի նախագահ Արթուր Մկրտչյանի պաշտոնավարման ժակետը լրացել է օգոստոսի 8-ին։ ՀՀ դատական օրենսգիրք սահմանադրական օրենքի 121-րդ հոդվածի համաձայն՝ դատարանի նախագահի պաշտոնավարման ժամկետը լրանալուց ոչ շուտ, քան երկու ամիս և ոչ ուշ, քան մեկ ամիս առաջ, իսկ այլ հիմքով առաջին ատյանի դատարանի նախագահի պաշտոնում թափուր տեղ առաջանալու օրվանից մեկշաբաթյա ժամկետում Դատական դեպարտամենտը կազմում և Բարձրագույն դատական խորհուրդ է ներկայացնում տվյալ առաջին ատյանի դատարանի բոլոր այն դատավորների ցուցակը, ովքեր ունեն դատավորի ոչ պակաս, քան երեք տարվա փորձառություն, չունեն կարգապահական տույժ, վերջին երեք տարվա ընթացքում չեն նշանակվել տվյալ դատարանի նախագահ և Բարձրագույն դատական խորհրդի անդամ չեն: Դատարանի նախագահի թեկնածուների ընտրության հարցն ընդգրկված է եղել ԲԴԽ-ի՝ օգոստոսի 15-ի օրակարգում, սակայն դատարանի նախագահ ընտրել չէր հաջողվել։
Ըստ շրջանառվող լուրերի՝ Գագիկ Ջհանգիրյանը, մինչ ԲԴԽ-ից հեռանալը, արդեն իսկ դատարանի նախագահի իր թեկնածուն ուներ՝ ի դեմս Գագիկ Պողոսյանի, որին, Խորհրդի անդամները չեն ընտրել։ Այդուհանդերձ, 60-ամյա Գագիկ Պողոսյանն այժմ կատարում է դատարանի նախագահի պարտականությունները՝ մինչև դատարանի նոր նախագահի ընտրությունը։
Նշենք, որ «Հայաստանի Հանրապետության դատական օրենսգիրք» սահմանադրական օրենքի 32-րդ հոդվածի 5-րդ մասի համաձայն՝ առաջին ատյանի և վերաքննիչ դատարանի նախագահի կողմից փոխարինող չնշանակվելու, լիազորությունների կասեցման, դադարման կամ դադարեցման դեպքերում նրան փոխարինում է տվյալ դատարանի այն դատավորը, որը տվյալ ատյանի դատարանում ունի դատավորի առավել երկար փորձառություն: Փորձառության հավասար ժամկետ ունեցող մեկից ավելի դատավորի առկայության դեպքում նախապատվությունը տրվում է տարիքով ավագ դատավորին:
Ի դեպ, դատական համակարգում, մասնագիտական հանրության շրջանակներում դատավոր Գագիկ Պողոսյանի վարկանիշն այդքան էլ բարձր չէ։
Թե երբ կբարձրացվի դատարանի նոր նախագահի ընտրության հարցը՝ դեռևս պաշտոնապես հայտնի չէ, միայն հարկ է նշել, որ այժմ ԲԴԽ-ում գիտնական-անդամների երեք թափուր տեղ կա, Խորհրդում այժմ դատավոր-անդամները մեծամասնություն են կազմում և, իշխանությունների քիմքին հաճո ամեն որոշում չէ, որ հալած յուղի պես կարող է ընդունվել, հետևաբար, ամենայն հավանականությամբ, դատարանի, ԲԴԽ նոր նախագահների ընտրության հարցը, ինչպես նաև՝ դատավորների վերաբերյալ քննվող կարգապահական գործերով քննությունը կհետաձգվի՝ մինչև Խորհրդի կազմի ամբողջական համալրում։ Նշենք, որ ԲԴԽ գիտնական-անդամների ընտրության հարցը պետք է քննարկվի ԱԺ-ի կողմից՝ առաջիկայում։