Կառավարությունը Կոնդի կառավարական ամառանոցում բնակվողների սննդի և կեցության մասին որոշում ընդունեց

Կառավարությունն իր այսօրվա՝ դեկտեմբերի 30-ի նիստում որոշում ընդունեց Կոնդի կառավարական ամառանոցում բնակվող պաշտոնյաների և նրանց ընտանիքների անդամների կեցության և սննդի հարցերի կարգավորման վերաբերյալ:

Նախագծով «Կոնդի առանձնատների տնտեսություն» պետական ոչ առևտրային կազմակերպության գործունեության նպատակի և առարկայի հստակեցման ներքո ամրագրվելու է պաշտոնյաների կեցության և սննդի ապահովման գործառույթը:

Նախագծի հեիմնավորման մեջ ասվում է. «Գնումների մասին» օրենքի «Գնման պլանավորումը և ֆինանսավորումը» վերտառությամբ 15-րդ հոդվածի 2-րդ մասի համաձայն՝ պետական գաղտնիք պարունակող գնումների պլանում ներառվում են ազգային անվտանգության ապահովման, «Հատուկ պետական պաշտպանության ենթակա անձանց անվտանգության ապահովման մասին» Հայաստանի Հանրապետության օրենքի 5-րդ հոդվածի 2-րդ մասով նախատեսված պաշտոնատար անձանց արարողակարգային ծախսերի, կեցության, սննդի և տրանսպորտային սպասարկման, ներառյալ՝ տրանսպորտային միջոցների տեխնիկական սպասարկման և նորոգման ոլորտում հատուկ տեխնիկական և ծրագրային, ռազմական տեխնիկայի, սպառազինության, ռազմամթերքի և ռազմատեխնիկական միջոցների ապահովման համար անհրաժեշտ ապրանքները, աշխատանքները և ծառայությունները:

2002 թվականի սեպտեմբերի 26-ի  N 1635-Ա որոշման 2-րդ կետի «ա» ենթակետով Կազմակերպության գործունեության առարկան և նպատակը սահմանող ձևակերպումները չեն ապահովում բավարար հստակություն՝ Կազմակերպության կողմից «Հատուկ պետական պաշտպանության ենթակա անձանց անվտանգության ապահովման մասին» Հայաստանի Հանրապետության օրենքի 5-րդ հոդվածի 2-րդ մասով նախատեսված պաշտոնատար անձանց կեցության և սննդի սպասարկման և ապահովման գործառույթների պատշաճ իրականացման համար»:

Որոշման երկրորդ կետով «գերատեսչական առանձնատուն» բառակապակցությունը փոխարինվել է «ծառայողական առանձնատուն» բառակապակցությամբ: