Վրաստանը երկարաձգել է կանոնավոր թռիչքների արգելքը

Վրաստանում միջազգային կանոնավոր թռիչքների սահմանափակումները երկարաձգվել են մինչև 2021 թվականի հունվարի 1-ը, այս մասին տեղեկատվությունը հրապարակվել է Վրաստանի քաղաքացիական ավիացիայի գործակալության կայքում:

Կորոնավիրուսային համաճարակի հետ կապված՝ Վրաստանը փակել էր իր սահմանները օտարերկրացիների համար՝ բացառությամբ հատուկ դեպքերի, և դադարեցրել օդային երթևեկությունը բոլոր ուղղություններով:

«Միջազգային կանոնավոր օդային երթևեկության իրականացման սահմանափակումները երկարացվել են և ուժի մեջ կլինեն մինչև 2020 թ. դեկտեմբերի 31-ը ներառյալ»,- ասվում է հաղորդագրության մեջ:

Միևնույն ժամանակ, գործակալությունը նշում է, որ կանոնավոր թռիչքների սահմանափակումը չի տարածվում միջազգային թռիչքների վրա, որոնք Թբիլիսիի միջազգային օդանավակայանը կապում են Մյունխենի, Փարիզի, Ռիգայի, Դոհայի, Վարշավայի, Աթենքի, Ամստերդամի, Վիեննայի, Բեռլինի և Միլանի օդանավակայանների հետ:

Սահմանափակումները չեն տարածվում նաև Քութայիսի միջազգային օդանավակայանի և Ռիգայի, Կատովիցեի, Վիլնյուսի և Դորտմունդի օդանավակայանների պլանային թռիչքների վրա: