Ախալքալաքում վենդետան չի բացառվում. դեպքի մասին պատմում է Արտակ Գաբրիելյանը

Ախալքալաքում տեղի ունեցած մասշտաբային ծեծկռտուքի ու սպանության պատճառը դեռեւս տարիներ առաջ 2 կողմերի միջեւ կենցաղային վեճն էր։ NEWS.am-ին Ջավախքի Հայկական Հասարակական Կազմակերպությունների Խորհրդի համակարգող Արտակ Գաբրիելյանը պատմեց, որ վիճաբանությունը թեժացել է արդեն օգոստոսի 8-ին։

«Երկու կողմերի միջեւ կենցաղային վեճ է տեղի ունեցել տարիներ առաջ, որ մինչեւ օրս շարունակվել է։ Օգոստոսի 8-ի առավոտյան մեկ անգամ ծեծկռտուք տեղի ունեցել է երկու կողմերի մեջ։ Ըստ նախնական տեղեկությունների՝ սպանվածի կողմը գնացել է գյուղ, հավաքել իր ընկերներին, եկել են քաղաք՝ ինչ-որ հաշիվներ պարզելու։ Այդտեղ էլ արդեն տեղի է ունեցել սպանությունը։ Այնուհետեւ սպանվածի կողմնակիցներն արդեն հրկիզել են սպանողի տունը, հայրական տունը, իրեն պատկանող հյուրանոցը եւ եւս 2 տուն։ Ընդհանուր այրված է 4 տուն եւ 1 հյուրանոց»,- պատմեց Գաբրիելյանը։

Նա նշեց, որ այս պահի դրությամբ վիրավորներ չկան. «Թեթեւ մարմնական վնասվածքներ ստացած անձինք հենց նույնը օրն էլ դուրս են գրվել հիվանդանոցից»։

Մեր հարցին՝ սա ինչպե՞ս կարող է ազդել հայ համայնքի վրա, Գաբրիելյանը պատասխանեց, որ սա համայնքային վեճ չի եղել. «Չեմ կարծում, որ ինչ-որ հետեւանքներ ունենան։ Չի բացառվում նաեւ վենդետա տեղի ունենա, շարունակություն ունենա այս դեպքը։ Տարածաշրջանային մակարդակի ոստիկանական ուժեր են կենտրոնացված այս պահին քաղաքում։ Երեկվա դրությամբ քաղաքի մուտքերի մոտ հսկողություն էր սահմանված»։

Նշենք, որ Ախալքալակում անկարգություններ էին սկսվել Կուլիկամ գյուղի բնակիչ 27-ամյա Վարդիկ Մարաբյանի սպանությունից հետո, եւս մեկ 27-ամյա հայ էլ ձերբակալվել է:

Սպանությանը հաջորդել է Ախալքալաքում սպանություն կատարելու մեջ կասկածվող Գաբրիելյանին պատկանող հյուրանոցային համալիրի, ռեստորանի, ինչպես նաեւ դեպքի վայրում գտնվող Գաբրիելյանի համախոհներին պատկանող մի քանի տների հրկիզումը քաղաքի տարբեր հատվածներում։

NEWS.am